CFBJ Cup sugdan karong adlawa

CEBU, Philippines - Taliwala sa hulga sa umaabot nga super  typhoon "Yolanda," ipadayon gihapon ang  "Mayor's Cup-CFBJ Cup nga salmotan sa tulo ka PBA teams karong gabii diha sa Cebu Coliseum.
 "We know that there is an incoming typhoon so the schedule of the games are subject to change but we hope that we can go through with the original schedule,"  matud pa ni CFBJ president Elias Baquero atol sa  press conference kagahapon didto sa GV Tower Hotel.
 Ang Global Port Batang Pier ug Barako Bull Energy moduwa sa tulo ka adlaw nga torneyo nga magsilbeng fund-raising project sa Cebu Federation of Beat Journalist (CFBJ) sa pakigtambayayong sa Enya Ideals ug Cebu City government.
 Lain pang mosalmot mao 13th Cebu Schools Athletic Foundation Inc. (CESAFI) champion University of the  Visayas (UV) Green Lancers ug CM Farm, usa ka commercial team.
 Ubos sa giya ni  UV Green Lancers assistant coach Van Halen Parmis, ang CM Farm moparada sa ilang duha ka Cameroonian recruits nga sila si  Ahmed Salihou, sa University of San Carlos (USC) ug Douglas N’jaapa  gikan sa University of the East (UE) Red Warriors. Uban nila ang beteranong si Ardy Larong, Mark Andaya, JR Guerillia, Ferdinand Lusdoc, Glenn Bolocon, Dino Daa ug Bryan Heruela.
 Sa opening game sa alas-5 sa hapon, ang CM Farm makigsangka sa  UV Green Lancers, samtang ang Barako Bull makigharong sa Global Port Batang Pier sa main game sa alas-7 sa gabii.
 Ang UV Green Lancers maoy mipuli sa Alaska Aces, kinsa miatras tungod sa dili maayong panahon.
 Ang torneyo magsilbe nga final tune-up sa Barako Bull ug Global Port sa pagbukas sa 39th PBA season karong Nobiyembre 17.
 Sa  Barako Bull  anaa nila si MVP Willie Miller, Mick Pennisi, JC Intal, Shawn Weinstein, Rico Maierhofer ug Cebuano guard Rob Labagala.
 Ang Global Port gilangkuban  nilang Jay Washington, Sol Mercado ug Enrico Villanueva uban sa ilang tulo  ka top picks nga silang UAAP MVP Terrence Romeo, RR Garcia ug Isaac Holstein.
 Ang mga tiket nagkantidad og P30 sa general admission, P200 sa upper box, P300 sa lower box, P400 sa stage seats ug P500 sa ringside. (BANAT NEWS)