Slaughter no. 1 pick kanhi UV player ikaduhang CESAFI center nga napiling no.1
CEBU, Philippines - Sama sa gilauman, ang kanhi collegiate standout nga si Greg Slaughter maoy napili nga No.1 overall pick sa gipahigayung 2013 PBA Rookie Draft kagahapon didto sa Robinsons Place Manila.
Ang 7-footer nga si Slaughter kinsa maoy labing taas nga rookie nga nagpa-draft gikuha sa crowd-darling nga Barangay Ginebra San Miguel nga maoy adunay katungod nga mopili sa No.1 rookie.
Si Slaughter kinsa midaog og kampiyonato sa kolehiyo uban sa University of the Visayas (UV) ug Ateneo De Manila University (UV), sakop usab sa Smart Gilas Pilipinas.
Sa pagsulod ni Slaughter, misamot kalig-on ang frontcourt sa Ginebra ilabi na nga anaa usab sa koponan ang high-flyer nga si Japeth Aguilar.
Sa second pick, ang reigning Governor’s Cup champion nga San Mig Coffee Mixers mikuha sa kanhi NCAA MVP nga si Ian Sangalang gikan sa San Sebastian College, samtang ang Rain or Shine Elasto Painters mibira sa laing bigman nga si Raymond Almazan sa Letran isip No.3 pick.
Ang Barako Bull Energy Cola mao unta ang nanag-iya sa No.4 pick, apan gihatag nila kini ngadto sa Ginebra bugti nila ni Willy Wilson ug Rico Maierhofer. Ang Ginebra mikuha sa Fil-American nga si James Forrester sa ikaupat.
Ang Global Port Batang Pier mibira ni UAAP MVP Terrence Romeo ug teammate niini sa Far Eastern University (FEU) nga si RR Garcia sa fifth pick ug sixth pick. Ang bigman nga si Isaac Holstein nakuha usab sa Global Port sa No.6 pick.
Mokumpleto sa top 10 pick sa PBA draft mao sila si Ryan Buenafe sa Alaska Aces, Alex Nuyles sa Rain or Shine ug Justin Chua sa San Mig.
Makapakurat usab ang gidangatan ni UAAP star Jeric Teng kinsa nalagpot ngadto sa second round sa draft diin nakuha siya sa ikaduhang dapit sa Rain or Shine Elasto Painters. Si Teng una nang gilauman nga masulod sa top 10 pick sa first round sa draft. (BANAT SPORTS)
- Latest
