SRP Sunday Club Christmas League padayonon karon

 CEBU, Philippines - Mobalik na ang aksiyon sa SRP Sunday Club Christmas League 2013 basketball tournament karong adlawa diha sa San Roque Parish gym sa barangay Subangdaku sa dakbayan sa Mandaue.

  Naputol og usa ka Domingo ang liga aron paghatag og higayon sa mga magduduwa   nga makapangandam alang sa barangay elections niadtong Oktubre 28.

 Karong adlawa, upat ka duwa ang ipahigayon diin ang defending champion Blue team  nga nasugamak  ngadto sa Maroon, 63-64 sa una nilang duwa, mosuway pagbangon dihang  ilang sangkaon ang  Green team.

 Lain pang mga koponan nga gisugat og daog sa una nilang duwa niadtong Oktubre 20 mao ang Green batok Red sa iskor nga  66-54, White  batok Black pinaagi sa overtime, 81-75 ug ang Violet batok Gray sa iskor nga 73-69.

 Matud pa ni Castañeda, ang liga mosubay og single round robin sa elimination round diin ang top four teams magsangka sa crossover semifinals. Ang No. 1 makigsangka sa No. 4, samtang ang No. 2 makigbatok sa No. 3.   Ang modaog maoy mag-abot sa "knockout" finals.

 Walo ka teams ang misalmot sa Christmas League 2013 sa SRP Sunday Club ubos sa liderato sa ilang aktibong presidente nga si Rom Castañeda.

 Moabag ni  Castañeda nga modumala sa SRP Sunday Club mao sila si Jun Atillo (vice president), Ruben Flores (secretary), Glenn Castañeda (treasurer), Arnold Aventajado (auditor) ug Nonoy Amora ug Melio Colina (PROs).

 Ang mga duwa gidumala ni league commissioner Monching Menaling.

 Ang tinuig nga liga gisuportahan sab ni Subangdaku Brgy. Capt. Ernie Manatad ug councilor Amay Dy. (BANAT NEWS)