Lexmark kampiyon sa South sa CSCC E-League
CEBU, Philippines - Giyatakyatakan sa Lexmark Stallions ang karibal nilang Accenture Sharks, 70-63 sa deciding game sa ilang "best-of-three" series aron masakmit ang titulo sa Southern Conference sa 9th CSCC E-League basketball tournament niadtong Sabado didto sa City Sports Club-Cebu gym sa Cebu Business Park.
Gumikan niini, ang Lexmark maoy nakakuha og katungod sa pakigsangka sa Northern Conference champion Aegis Vipers sa "best-of-three" regular season finals nga sugdan karong Sabado. Ang Game-2 gikatakda sa Nobiyembre 9, samtang ang Game-3 kun gikinahanglan ipahigayon sa Nobiyembre 10.
Si Franco Angelo Cipriano mirehistro'g 17 puntos uban ang 11 ka rebounds alang sa Lexmark nga bugnaw kaayo pagsugod sa duwa hinungdan nga nabiyaan sila'g otso puntos sa halftime, 24-32.
Apan ang Lexmark nanginit sa third period diin mipaulbo kini'g 26-11 run aron ilogon ang labaw, 50-33 paingon sa katapusang hugna sa duwa.
Napugngan sa Lexmark ang opensa sa Aegis sa final period aron maangkon ang siyete puntos nga kadaugan.
Si Cipriano nakakuha sab og suporta ni Niel Tiempo nga miamot og 15 puntos ug Siegfred Ofonda nga mitampo'g 13 puntos.
Ang regular season MVP ug Rookie of the Year awardee nga si Archie Brian Batua mibalik gikan sa injury, apan wala kini makapadaog sa iyang koponan kay igo lang siya miposa og 10 puntos.
Si Jasper Loreto maoy nangu sa Accenture nga milansang og 14 puntos, gisundan ni Ryan Edward Llanos nga mitimbre og 13 puntos. (BANAT NEWS)
- Latest
