Adlawan molumba sa Ormoc City

CEBU, Philippines -  Garbo sa Sugbu  nga si Jon-Jon Adlawan nangahas pagsakmit  sa unang dapit sa pro open category sa  9th leg sa Kopiko Astig 3-in-one Supercross National Series karong Sabado didto sa Ormoc  City.

 Human sa iyang sunod-sunod nga kadaugan sa Cagayan de Oro ug Ilo-Ilo legs niadtong Agosto ug Septiyembre, ang multi-titled nga si Adlawan laraw nga moilog sa No. 1 spot nga gipanag-iya karon ni Glenn Aguilar.
 Si Adlawan aduna nay 334 puntos alang sa ikaduhang dapit, samtang ang nag-una nga si Aguilar mihipos og 354 points.
 Ang kadaugan sa Ormoc leg maoy motukmod ni Adlawan ngadto sa unang dapit nga mopalapad sa iyang kahigayonan alang sa overall championship.
 Ang Kopiko Astig 3-in-1 series adunay 12 ka legs nga gisugdan niadtong Enero dinhi sa Sugbu ug matapos sa Disyembre diha  sa South Road Properties (SRP).
 Gawas sa pro open class, ang lumba gilangkuban usab sa pro lite, intermediate, open enduro, underbone, peewee 50cc,  peewee  65cc, veterans A, B and C, beginners, mini ug women's categories. (BANAT NEWS)