UV Lancers sud sa Quarterfinals sa Unigames

CEBU, Philippines - Gipukan sa University of the  Visayas (UV) Green Lancers ang UAAP team nga Ateneo Blue  Eagles, 94-84  sa nagpadayon nga UniGames  kagahapon didto sa Bacolod City.

 Tungod sa maong kadaugan, ang 13th Cebu  Schools Athletic Foundation Inc. (CESAFI) champion UV Lancers maoy  nangu  sa  Bracket-B sa ilang 3-0 na baraha.
 Karong adlawa, ang UV Lancers makigsangka sa host University of San Agustin-Bacolod alang sa katapusang duwa sa elimination round. 
 Mapilde man o modaog, ang UV Lancers segurado na nga moabante sa crossover quarterfinals. Adunay posibilidad nga magbagat sab didto sa  Bacolod ang UV Lancers ug ang CESAFI third placer University  of  San  Carlos (USC) Warriors nga wala sab mapilde sa maong torneyo.
 Mag-ilog sab karon sa  no. 1 sa ilang bracket ang Warriors ug ang UAAP runner-up University of Sto. Tomas (UST) Growling Tigers.
 Si Wowie Escosio maoy nangu sa UV Lancers human siya moposa og 23 puntos, gisundan ni  John Abad sa iyang  22 puntos. Si Steve Cedrick Akomo midugang  og 16 puntos,  samtang   silang Francisco Arong ug Leonard Santillan miamot og 10 puntos  matag usa.
 Matud pa ni Lancers coach Felix 'Donbel' Belano nga ang ilang kadaugan batok sa Ateneo ug ang ilang pagsalmot sa UniGames usa ka maayong paagi sa ilang pagpangandam alang sa umaabot nga Philippine Collegiate Champions League (PCCL).  Bisan  kampiyon ang UV Lancers sa CESAFI, mopailawom gihapon sila sa elimination round sa Visayas leg.
 Si Kiefer Ravena maoy nangu sa Ateneo nga mibugha og 20 puntos, samtang   Sugbuanong si Jerie Marion Pingoy miamot og 15 puntos.
 Ang 6-foot-10 import sa Ateneo  nga si Emewike igo lang miiskor og singko puntos.
 
Puntos matag usa

 UV (94) - Escosio 23, Abad 22, Akomo 16, Arong 10, Santillan 10, Villamor 8, Octobre 6, Codilla 2, Marquez 2

 Ateneo (84) - Ravena 20, Pingoy 15, Capacio 14, Asistio 12, Tolentino 9, Ramos 8, Emewike 5  (BANAT NEWS)