SSC ug EAC duna'y purohan
CEBU, Philippines - Human sila modaug sa tagsa-tagsa nila ka kaatbang kaniadtong Biyernes sa gabii, kalit lang nabuhi ang kampanya sa San Sebastian Stags ug sa Emilio Aguinaldo College nga moabante sa Final Four sa NCAA Season 89 apan kinahanglan pa silang modaug sa nahibilin nilang mga krusyal nga duwa didto sa Fil-Oil Flying V Arena sa San Juan, Metro Manila.
Gipukan sa General ang Jose Rizal University Heavy Bombers, 78-68 ug sa laing duwa, naka-ikyas ang Stags batok sa Perpetual Altas, 71-65.
Ang Stags (10-7) ug Generals (9-8) nagkaduol sa ilang tinguha nga moabante sa Final Four diin duha pa lang ang seguradong moabante niining tungora ug sila mao ang San Beda Red Lions ug Letran Knights.
Ang natay-og karon mao ang Altas (11-7) kinsa maoy kasamtangan nga naghupot sa ikatulong luna alang sa lumba sa Final Four.
Kinahanglan nga sundan pa sa Stags ug sa General ang ilang kadaugan ug manghinaut sab sila nga mapilde ang Altas sa umaabot nilang duwa ug kung dunay tabla, adto na sa quotient daugon ilabi na kung makamugna sila'g triple tie.
Magbagat pag-usab ang Stags ug ang Arellano Chiefs unya sa Oktubre 24 samtang magtakos ang Generals ug ang Mapua Cardinals Altas unya sa Oktubre 26, ang kataposang adlaw sa elimination round. Parehong krusyal ang maong duwa nga maoy posibleng modeterminar kung kinsa gyud ang mosulod sa Top 4.
Ang semifinals sugdan unya sa Nobiyembre 7 ug ang best-of-three finals sugdan sa Nobiyembre 11. (BANAT NEWS)
- Latest
