San Mig miduol sa kampiyonato
CEBU, Philippines - Usa ka daog nalang ang gikinahanglan sa San Mig Coffee Mixers aron makuha na nila ang titulo sa PBA Governor’s Cup human nila gipukan ang Petron Blaze Boosters, 114-103, sa Game-5 kagabii didto sa Smart Araneta Coliseum.
Sa maong kadaugan, nakuha sa San Mig ang krusyal nga 3-2 nga labaw sa ilang ‘best-of-five’ finals series ug kahigayunan nga hingpit nga mokampiyon kun mudaog sila pag-usab sa Game-6 karong Martes.
Sikit ang duwa tali sa duha ka managsuong koponan sa unang duha ka kuwarter nga miresulta sa 34-all nga panagtabla, apan nakuha sa San Mig ang momentum sa tunga-tungang bahin sa third period.
Ang three-point shots nila ni ‘Best Import’ Marqus Blakely ug point-guard Mark Barroca maoy mipatay sa depensa sa Petron nga milabaw og 70-66 sa hinapos nga bahin sa third quarter.
Gikan didto nakontrolar na sa San Mig ang duwa ug gisaka pa nila ngadto sa double-digits ang labaw atol sa final period, 103-92.
Si Blakely maoy leading scorer sa San Mig sa iyang 30 puntos, samtang si Barroca mirehistro og 22 puntos ug si James Yap mitampo og 14 puntos.
Ang Petron nga nagkinahanglan nga mudaog sa Game-6 aron mapugos ang serye ngadto sa ‘do-or-die’ game gipangulohan ni import Elijah Millsap sa iyang 37 puntos, samtang ang Cebuano center nga si Junemar Fajardo adunay 23 puntos. (BANAT NEWS)
- Latest
