Kontrang Villanueva mi-atras
CEBU, Philippines - Adunay bag-ong kontra si undefeated ALA Gym boxer 'King' Arthur Villanueva sa umaabot niyang away sa Pinoy Pride XXII karong Oktubre 26 diha sa Waterfront Cebu City Hotel and Casino.
Si Villanueva makigharong unta sa Mehikanong si Jose 'Matador' Cabrera, apan miatras kini tungod sa isyu sa papeles niini ug sa visa.
Gumikan niini, si Villanueva moharong sa bag-o niyang kontra nga si Mexican Edgar 'Chololo' Martinez sa supporting main event sa maong boxing card nga gipasiugdahan sa ALA Boxing Promotions ug sa ABS-CBN Sports.
Dili hinuon kakompiyansaan si Martinez kay nabantog kini nga usa ka delikadong kontra. Si Martinez una na usab nga giplanohan nga ikasangka sa laing Pinoy fighter nga si Marlon Tapales, apan wala kini mahinayon.
Si Martinez nakigsangka na sa mga dekalibreng boksidor sa iyang dibisyon sama nila ni kanhi WBA flyweight champion Sammy Gutierrez ug Ivan Morales, ang manghod ni Mexican legend Erik Morales.
Ang Villanueva-Martinez maoy supporting bout sa giatngang sangka tali nila ni WBO Asia Pacific super bantamweight king Genesis 'Azukal' Servania ug veteran Rafael 'El Torito' Concepcion sa Panama.
Ang mga tiket sa maong blockbuster boxing event mahimong mapalit diha sa SM City- Cebu cinema, SM- Consolacion cinema, Robinson's Department Store Costumer Service, ALA Gym BTC, ALA Gym Mandaue, ALA Gym Minglanilla, ALA Gym Banawa ug Bisaya Ispisyal sa Ayala Center-Cebu.
Alang sa ticket reservations, mahimong motawag sa mga numero 505-9513/ 09231072890 ug 09158690905. (BANAT PALARO)
- Latest
