Roque naghari sa CEPCA 23rd anniversary chessfest

CEBU, Philippines -  Nasugamak si NM Merben Roque sa final round batok ni Eden Diano, apan bisan pa niini, siya gihapon ang nakatag-iya sa korona sa Cebu Executives and Professionals Chess  Association (CEPCA) 23rd anniversary chess open sa miaging gabii didto sa The Event Centre sa SM City-Cebu.

 Gamit ang puti nga pisa, si Roque maoy miatake gikan sa pagsugod, apan nagkasayop-sayop siya  nga nakahulga sa iyang Queen ug Rook sa Knight ni Diano. Gipahimuslan ni Diano ang higayon aron patilawon si Roque sa iyang una ug bugtong pilde sa 9-round  Swiss system competition nga gipasiugdahan sa CEPCA sa pakigtambayayong sa Sugbuanong chess patron Boojie Lim sa  Rose Pharmacy Inc.

 Si Roque, ang kanhi Shell Youth Active chess national champion, mitapos sa duha ka adlaw nga torneyo bitbit ang 8.0 puntos ug nagtabla uban sa batan-ong si Rhenzi Kyle Sevillano, apan si Roque maoy mibulsa sa P7,000 nga premyo pinaagi sa superior tie-break output.

 Ang 14-anyos nga si Sevillano mitapos sa iyang kampanya uban ang kadaugan batok ni Rogelio Enriquez Jr.

 Gawas sa pagdaog og P5,000, si  Sevillano nakadawat sab og dugang P500 sa iyang pagdaog isip top player sa kiddies 11-15 age bracket, gisundan ni John Francis Balbona ug Vicmil Pepito nga parehong mihuman sa torneyo uban ang 6.0 puntos.

 Si Diano nakadawat og P3,000 sa  iyang pagpahiluna sa ikatulo  nga dapit uban ang 7.5 puntos, samtang silang Richard Natividad ug Bryll John Arellano mibulsa og P2,000 ug P1,000 sa pag-okupar sa ikaupat ug ikalima nga adunay 7.0 puntos.

 Sila si Edsel Montoya, Ramil Wadim ug NM Leonardo Alidani  nalandig sa ikaunom ngadto sa ikawalo nga nagbitbit sab og 7.0 puntos.

 Samtang sila si Enriquez, Joel Pacuribot, Glicerio Pardillo Jr., Yves Christian Fiel, Erwin Ababat,  Felix Shaun Balbona ug Bonn Rainuld Tibod maoy mikompleto sa round 15 nga adunay 6.5 puntos matag usa.

 Ang 51-anyos nga si Alidani gihatagan og dugang P500 nga ganti sa iyang pagdaog isip top performer sa seniors division, gisundan ni Ababat ug former non-smoker champion Carlos Moreno III.

 Si Christian Yves maoy labing maayo sa juniors division nga mihipos og 6.5 puntos, gisundan nilang Felix Shaun Balbona ug Alan Pason. Ang top three sa female entries mao sila si Laila Camel Nadera nga adunay 6.0 puntos ug Airene Rosillos ug Queeni Marie Cablao sa ilang 5.5 puntos.

 Mitunol sa P34,000 nga ganting salapi ngadto sa mga mananaog mao ang taligawas nga presidente sa CEPCA nga si Jojo Muralla ug umaabot nga club president Engr. Jemar Maratas, CEPCA founder Boy Pestaño ug tournament director Jun Olis.

 Adunay kinatibuk-ang 156 ka partisipante ang misalmot sa kompetisyon nga nahimong posible pinaagi sa suporta sa Jemar Engineering Services, Lite Shipping, Atty. Jennoh Tequillo, Andrew Aznar, Kelly Uy, Modern Rent A Car ug charitable Cepcans. Ang mga duwa gidumala ni chief arbiter FA Felix C. Poloyapoy Jr. uban ni FA Marvin Y. Ruelan ug CA Edwin Parilla III. (BANAT NEWS)