Filpinos vs. Latinos sa Pinoy pride xxiii

CEBU, Philippines - Nabantog nga ALA Promotions subli na sab nga mokulit og kasaysayan sa boxing  sports sa Pilipinas dihang lima ka mga Filipino boxing stars ang moaway sa usa ka card atol sa  23rd  edisyon sa Pinoy Pride series nga giuloha'g "Filipinos vs. Latinos" sa Nobiyembre 30 didto sa Smart Araneta Coliseum.

 Ang maong blockbuster card pangulohan sa double world championships bout nila ni WBO light flyweight champion Donnie 'Ahas' Nietes ug WBO minimumweight titlist Merlito 'Tiger' Sabillo nga pulos makigharong sa  mga Latino nilang kaatbang.

 "We have five main event boxers all fighting in one card that will surely put stamp on the Philippines as one of the boxing powerhouses in the world," matud pa ni ALA Promotions President and CEO Michael P. Aldeguer atol sa press conference kagahapon didto sa Aegean room sa Waterfront Cebu City Hotel and Casino.

 Gawas nilang Nietes ug Sabillo, laing tulo ka  ALA stars nga silang  welterweight prospect Jason 'El Niño' Pagara, former two-time world title challenger AJ 'Bazooka' Banal ug Milan 'El Metodico' Melindo ang mopakita sab og aksiyon sa maong boxing show nga gipaluyohan sa ABS-CBN Sports.

 "So far, only Sabillo has an opponent in undefeated Nicaraguan Carlos Buitrago. We are working right now on the details of the other Latino boxers who will face the rest of the guys," matud ni Aldeguer.

 Si Melindo sa iyang bahin,   mosaka pagbalik sa ring human  sa iyang sakit nga kapildihan ngadto ni Mexican champion Juan Francisco Estrada sa ilang WBO/WBA flyweight title match niadtong Hulyo 27 didto sa Macau. 

 Ang nasud katapusang mi-host og double world title fight niadtong Abril 19, 2009 didto gihapon sa Big Dome nga gibitoonan nilang Nonito Donaire Jr. ug Brian Viloria.

 Sa maong away, si Donaire nakadepensa sa iyang IBF flyweight title pinaagi sa fourth round TKO ni Mexican Raul Martinez, samtang si Viloria mipalagpot sa trono ni kanhi Mexican Ulises Solis aron ilogon ang korona sa light flyweight division.