USC abante sa SBP ug Passerelle regional finals

CEBU, Philippines - Miabante ngadto sa Visayas regional finals ang University of San Carlos (USC) SBP  ug Passerelle teams human sila mikulit sa ilang ikaduhang daog sa nagpadayon nga BEST Center SBP Passerelle Twin Tournament didto sa Iloilo Sports Complex sa dakbayan sa Iloilo.

Sa SBP division, gipalagpot sa USC ang Colegio de la Purisima Concepcion (CPC) of Roxas, 40-29 aron magsolo sa liderato sa four-team field sa regional finals sa ilang 2-0  nga  baraha. Human sa ilang 5-6 nga biya, mi-rally gilayon ang Baby Warriors aron maoy molabaw atol sa halftime, 21-14 ug wala madugay, ilang nainat ang ilang labaw ngadto sa 32-16 human sa tulo ka quarters.

Samtang awtomatik nang nakakuha'g luna sa finals ang USC, moduwa pa gihapon sila batok sa University of St. La Salle (USLS) of Bacolod sa ilang katposanf duwa sa elimination. Sa laing sangka sa SBP, midaug ang Ateneo de Iloilo batok sa USLS, 43-34 samtang gimakmak sa USLS  ang CPC, 53-20.

Kinahanglan lang sa USLS nga modaug batok sa USC aron ma-angkon ang ikaduhang luna sa finals diin makigtakos sila sa Sugboanong kampyon alang sa titulo sa SBP.

Sa laing bahin, daw wala kaayo paningta ang USC Passerelle dihang ilang gidabodabohan ang College of St. John’s Roxas (CSJR), 84-30 aron sab magsolo sa liderato sa ilang 2-0 nga baraha ug makingsangka batok sa USLS of Bacolod kinsa aduna sa'y 2-0 nga baraha alang sa titulo.

Miabante sa finals ang USLS Bacolod human ilang gipukan ang Ateneo de Iloilo (43-34)  ug ang CSJR (84-30) busa maoy mag-ilog alang sa ikatulong pwesto ang AdI ug CSJR. 

Ang Visayas Regional Finals sa BEST Center SBP Passerelle Twin Tournament gipaluyohan sa Milo.

Ang mahimong champion maoy moabante alang sa national finals didto sa San Fernando, Pampanga unya sa Nobiyembre 23-24. Ang La Salle Greenhills maoy unang milukat og ticket ngadto sa national finals human sa ilang kadaugan didto sa SBP division sa Metro Manila leg samtang ang Chiang Kai Shek  High School maoy  kampyon sa  Passerelle division.

Ang sunod ipahigayon mao na sab ang Mindanao finals unya sa Oktubre 26-27 didto sa Davao. Ang maong torneyo gipaluyohan sab sa RCBC Savings Bank.  (SPORTS BANAT)