USC naglaraw og "Double championship"

CEBU, Philippines - Damgo sa University of San Carlos (USC) nga mohimo'g talagsaong "double championship" sa SBP ug  Passerelle division titles  sa Visayas Regional Finals sa BEST SBP Passerelle Twin Tournament Visayas Regional Finals didto sa Iloilo Sports Complex sa dakbayan sa Ilolio.

 Ang USC maoy defending Visayas champion sa SBP division ug nagtinguha sa ilang ikaduhang sunod-sunod nga titulo alang sa national finals.

 Sa laing bahin, ang USC Passerelle team, buot sab mosakmit og titulo aron hatagan ang Cebu sa ilang ikawalong sunod-sunod nga korona aron sundan ang miaging 2012 title nga nadaog sa University of the Visayas ug ang lima sa Sacred Heart School-Ateneo de Cebu gikan sa 2007 hangtod na  sa 2011.

 Sa SBP division,  ang USC makigsangka sa mga regional rivals sama sa Ateneo de Iloilo (AdI), University of St. La Salle (USLS) ug Colegio de la Purisima Concepcion (CPC) sa Roxas.

 Nasuhito na ang USC sa AdI ug sa CPC Roxas tungod kay ila na kining nakontra niadtong 2012. Ang USLS  maoy bag-o nilang karibal.

 Ang Passerelle division gilangkuban sa USC, AdI, USLS ug St. John’s of Roxas.

 Ang  mga duwa himuon karon ug ugma diin mosunod kini og single round-robin format alang sa classification phase.   Ang top two teams sa matag dibisyon magharong alang sa kampiyonato ning torneyo nga gipaluyohan sa Milo ug RCBC Savings Bank. (BANAT PALARO)