Bayabas tarnate temporaryong nag-una

CEBU, Philippines -  Temporaryo karon nga nag-una sa standing ang Bayabas Tarnate human  mirehistro  og  laing daog  sa juniors division sa Ibabao-Estancia "3rd Barangay Captain's Cup" basketball tournament.  Ang Bayabas Tarnate aduna nay 3-0 nga baraha human ilang gipilde ang Lumchicai sa iskor nga 45-36 niadtong Martes sa gabii didto sa Ibabao-Estancia Multi-purpose gym sa dakbayan sa Mandaue.

Si Rogen Ygay mitusak og siyete puntos ug si Roland Reliente miposa og duha ka three-pointers sa first period aron  hatagan ang Bayabas Tarnate og 15-6 nga bentaha paghuman sa unang 10 minutos sa duwa.

Miaksiyon og gukod ang Lumchicai sa second quarter ubos sa giya sa managsuong Cabahug nga silang Cedrick ug Marvin, 15-10 nga nakapaaghat ni Bayabas Tarnate coach Brando Siacor pagtawag og time-out.

Gikan niadto, ang Bayabas Tarnate maampingon na sa ilang duwa hinungdan nga miburot ang ilang labaw ngadto na sa 20 puntos, 39-19 paghuman sa third period.

Sila si Bingbong Booc, Lemuel Veloso ug Jay-R Omega maoy responsabli pag-inat sa labaw sa Bayabas Tarnate nga wala na mohatag pa'g higayon sa Lumchicai nga makagukod hangtod nahurot ang oras sa duwa.

Si  Reliente maoy topscorer sa Bayabas Tarnate nga mipupo'g 12 puntos, gisundan ni Ygay nga miani og nuybe puntos.

Ang Lumchicai, kinsa niduwa nga walay coach gipangulohan nilang Cedrick Cabahug ug Perez nga parehong miugkat og nuybe puntos.

Ang tinuig nga liga gipaluyohan sa Ibabao-Estancia Barangay Council ubos sa liderato ni Brgy. Capt. Carmelino 'Jun' del Mar Jr. ug sa SK nga gipangulohan sa ilang tsirman nga si Jake E. del Mar.

Ang working committee gipangulohan ni sports chairman Hon. Jonathan dela Peña uban nilang councilors Junjun Yuson ug

Jun Egay  uban sa abag nilang  Venrhey Calderon, Tata Reyes, Macmac Ceniza, Eldie Soco, Celso Dacullo, Welfie Soco ug Edgar Gabutan.

Puntos matag usa

BAYABAS TARNATE (45) - Reliente 12, R. Ygay 9, Sambilad 6, Booc 4, C. Ygay 4, Veloso 4, Omega 4, Comendido 2
LUMCHICAI (36) - C. Cabahug 9, Perez 9, M. Cabahug 7, Calbo 4, Reyes 2, Labrador 2, Quimera 2 (BANAT NEWS)