11th season sa ibp hoop misikad

CEBU, Philippines - Midaug dayon ang Los Demonyos, Pecandela Law Firm, Dissenters ug Eagles atol sa pagbukas sa ika-11 nga season sa IBP Basketball League-2013 basketball tournament kaniadtong Sabado didto sa Capitol Parish gym sa dan Escario, ning dakbayan.

Ang Los Demonyos ni Bads del Prado midaug batok sa YLAC, 77-57 samtang ang Pecandela Law Firm mimakmak sa Super Idols ni playing coach Bong Pepito, 53-44 ug midaug sab ang Dissenters batok sa Primos Team ni Atty. Enric Rama, 79-64 ug sa kataposang duwa, gilubong sa Eagles ni coach Edsel Vallena ang Pañeros, 87-73.

Gidominar sa Los Demonyos ang ilang sangka batok sa YLAC gikan sa pagsugod hangtod sa kataposang huni sa buzzer human lang sa ilang 21-13 nga labaw sa fourth period aron ilubong ang ilang kaatbang og 20 puntos.

Mipakatap og 25 puntos si Del Prado lakip ang lima ka three-pointers aron pangulohan ang Demonyos ug giabagan siya nilang Richard Bauzon ug Richie Capahi kinsa nagkumboya og 23 puntos samtang si Van Ligutan maoy nangu sa YLAC  sa iyang 27 puntos.

Sa sayo pa, si Francis Pepito maoy nangu sa Pecandela Law Firm sa ilang pagpukan sa Super Idols pinaagi sa come-from-behind fashion dihang ilang na-outscore ang ilang karibal, 17-10 aron molampos.

Si Tommy Yu miposa og 16 puntos ug midugang si Pepito og 13 puntos alang sa Pecandela samtang si Gilbert Arrabis maoy nangu sa Super Idols sa iyang 15 puntos ug siya lang maoy plater sa ilang team nga nakahimo og double figures.

 Sa laing bahin, midaug ang Dissenters pinangulohan ni kanhi UC Webmaster pointguard Kern Sesante kinsa maoy nagtimon sa ilang kadaugan bisan pa sa iyang amot nga nuybe puntos. 

Silang Matt Velez ug Giovanni Sususco maoy nangu sa Dissenters sa ilang 20 ug 19 puntos matag usa samtang si Al Limalima mihimo'g 15 puntos ug si Steve Pascua may 10 puntos alang sa Primos.

Sa main game, miburak og 21 puntos Roy Velmonte aron pangulohan ang Eagles samtang ang Pañeros gipangulohan ni Michael Molde sa iyang 16 puntos ug miabuno si Nilo Balorio og 10 puntos.

Ang kasamtangan nga 11th Season gipasiugdahan sa  IBP officials nga gipangulohan ni Atty. Enric Rama kinsa maoy napiling presidente ug gipaluyohan sa Pages Holdings, Inc., Native Spring Water ug Wellcome Hotel.  (BANATSPORTS)