RCAF mipukan sa ESER, abante sa AMBL Cup semis

CEBU, Philippines -  Miiskor og 99-86 nga kadaugan ang RCAF batok sa ESER sa ilang knockout match sa elimination round aron moabante sa

semifinals sa  AMBL Basketball Cup 2013 niadtong Miyerkules sa gabii didto sa Vicente Sotto Memorial gym sa barangay Punta Princesa,

ning dakbayan.

 Ang RCAF ni Romy Faunillan naglabaw og tres puntos 33-30 sa opening period pinaagi sa pagtimon sa ilang three-point artist

Alwin Tabasa, kinsa mipabuhagay og 17 puntos, apan  ang ESER sa pagpangulo ni kanhi UC Junior Webmaster Melvin Tabura mibawos

aron makasikit, 54-55 sa halftime.

 Kalit nga nanginit ang RCAF  ug milusad kini'g 26-14 aron   moposte'g 13 puntos nga labaw paingon sa fourth period, 81-68.

 Si Alwin Tabasa maoy topscorer sa RCAF nga mipugnit og 21 puntos lakip na ang lima ka triples, silang Epon  Nacua ug kanhi

STI cager Jun Sumargo parehong miamot og 16 puntos, samtang si Rommel Garcia mitampo'g 14 puntos.

 Si Tabura maoy nangu sa ESER pinaagi sa iyang 21 puntos, samtang ang team owner ug kanhi USJ-R Jaguar nga si Eser

Saramosing miabuno og 19 puntos.

 Sa maong kadaugan, ang RCAF maoy nakakuha sa katapusang luna sa semifinals diin  ilang harungon ang topseed nga  MP

Customs ni Marty Pimentel. Ang no. 2 nga Team Rama ni customs police Jingjing Rama  makigsangka  sa no. 3 Blessel Enterprises ni Edgar

Camota.

 Ang semifinals sa maong torneyo nga gipaluyohan sa Du Ek Sam (DES) Inc. ug LG Appliance Master duwaon sunod semana

didto gihapon sa Vicente Sotto Memorial Gym.

puntos matag usa

 RCAF (99) - Tabasa 21, Nacua 16, Sumargo 16, Garcia 14, Faunillan 6, Del Campo 6,

Ybañez 6, Dinampo 4, Ciabo 4, Baclay 4, Rodil 2

 ESER (86) - Tabura 21, Saramosing 19, Sepulveda 13, Abellanosa 12, Molina 11, Almojallas 6, Abellana 2, Redulosa 2 (BANAT NEWS)