UV nakatabla, 2-2

CEBU, Philippines - Gigamit sa beteranong si John Abad ang iyang championship experience aron pangulohan ang University of the Visayas (UV) Green Lancers  pagkulit og 71-66 nga kadaugan batok sa Southwestern University (SWU) Cobras  sa Game-4  sa ilang "best-of-five" championship series sa 13th Cebu Schools Athletic Foundation Inc. (CESAFI) men's basketball tournament  kagabii  didto sa Cebu Coliseum.

 Ang kadaugan sa UV, kinsa nakatabla sa series, 2-2 nakapugos  ngadto sa deciding Game-5 nga gitakda ugma sa alas-4 sa hapon diha gihapon sa Cebu Coliseum.

 Human nila tugoti nga modaog ang UV Lancers sa Game-4 gabii, posibleng mobalitok ang presyur ngadto sa SWU Cobras human sila mapakyas sa paglangkat sa korona sa ikaduhang higayon.

 Sa miaging tuig, ang Cobras midaog sa sikit kaayong Game-5 ug karong tuiga, higayon na sa Lancers ang pagbawos alang sa posible nilang ika-10 nga korona.

 Ang Lancers sayo kaayong milubong sa Cobras, 22-8 ug sukwahi kaayo ang matang sa  duwa nila human sa ilang 89-82 nga kadaugan sa Game-2 nga misangpot ngadto sa double overtime.  Kanunay nga naglabaw ang Lancers didto sa uwahing bahin sa second period, 41-25, apan mihiyos kini  sa halftime, 39-28.

 Ang Cobras nakahimo pagsikit sa fourth period ug may higayon pa unta silang modaog kay tres puntos na lang ang ilang biya  human sa split charities ni Monbert Arong, 66-69. Apan nahanaw ang tsansa sa Cobras dihang misipyat si rookie Adams Mohammed sa iyang duha ka free throws.

 Lima lang ka players sa Cobras ang naka-iskor, apan ang dakung kuwang sa ilang opensa mao ang mga puntos nilang Arong ug Mohammed, kinsa igo lang nagkumboya'g nuybe puntos. Si Arong miiskor og siyete puntos, samtang dos puntos ang naani ni Mohammed.

 Wala sab makatabang si Fabrice Siewe tungod kay mahimong "predictable" ang ilang opensa kun anaa siya sa sulod ilabi na kun  adunay "pressure defense."

 Si Abad miburak og 24 puntos alang sa Lancers, samtang si Wowie Escocio miamot og 14 puntos nga maoy usa sa labing maayo niyang gipakita sa finals. Nadasig pagbalik si Steve Cedrick Akomo, kinsa miabuno og 11 puntos.

 Ang gilatos nga Cobras gipangulohan ni Mark Jayven Tallo, kinsa miposa og 28 puntos, gisundan ni Landry Sanjo nga adunay 17 puntos. (BANAT NEWS)