Pajo-A midaog na sab

CEBU, Philippines - Hugot nga depensa sa tunga-tungang bahin sa final period maoy gihimong hagdanan sa team Pajo-A aron makab-ot  nila ang daog batok sa LumChiCai-B, 64-55 sa seniors division sa nagpadayong aksiyon sa 3rd Barangay Captain's Cup" basketball tournament niadtong Huwebes sa gabii didto sa bag-ong multi-purpose gym sa Brgy. Ibabao-Estancia, Mandaue City.
 Naggukod ang Pajo-A sa third period, 30-31 ug nabiyaan pa kini og sayes puntos  human mitira og laing three-pointer si Ray Jay Pungtan, 38-32 sa nanghinapos nga bahin sa maong kuwarter.
 Ang Pajo-A nga maoy mikontrolar sa first quarter miilog pagbalik sa momentum dihang mipatuman sila sa ilang hugot nga depensa hinungdan nga naguba ang duwa sa LumChiCai-B ug didto na nagsugod ang ilang kalbaryo human sila makahimo og tulo ka sunod-sunod nga turnovers.
 Si Dexter Ajos maoy mihatag sa Pajo-A og uno punto nga labaw, 47-46, nainat pa kini sa kombinasyon nilang Sheldon Gahi ug Elwin Decon, 51-46 sa nahabiling 4:55 sa duwa.
 Ang kadaugan gipangulohan ni Gahi, kinsa mipupo'g 20 puntos diin ang 11 niini iyang nahimo sa first quarter, gisundan ni Harry Villahermosa sa iyang 11 puntos. Si  Ajos mitimbre og 10 puntos, samtang si Decon igo lang miiskor og nuybe puntos alang sa

Pajo-A nga wala pay pilde sud sa duha ka duwa.
Ang LumChiCai-B nga gilihian og pilde, gipangulohan ni  Dondon Dequita nga miposa og 16 puntos, samtang si Pungtan mitusak og 14 puntos.
 Ang tinuig nga liga natukod pinaagi sa mga paningkamot sa Ibabao-Estancia Barangay Council ubos sa liderato ni Brgy. Capt.

Carmelino 'Jun' del Mar Jr. ug sa SK nga gipangulohan sa ilang tsirman Jake E. del Mar.
 Ang working committee gilangkuban ni sports chairman Hon. Jonathan dela Peña uban nilang Hon. Junjun Yuson, Hon. Jun Egay ug Edgar Gabutan uban sa abag nilang Winston Ouano, Joel Cortes, Venrhey Calderon ug Bonyuk Bajamonde.
  
PUNTOS MATAG USA

 PAJO-A (64) - Gahi 20, Villahermosa 11, Ajos 10, Decon 9, Cabahug 8, Mallarga 4, Cortes 2
 LUMCHICAI-B (55) - Dequita 16, Pungtan 14, Estrera 8, Molero 6, Sesaldo 5, Ceniza 4, Bongo 2