SWU pabor na sab nga mokampiyon

 CEBU, Philippines - Pabor na sab nga mokampiyon ang Southwestern University (SWU)  Cobras human ilang gipilde ang University of the Visayas (UV) Green Lancers sa ikalimang higayon niini  nga season, 73-60 alang sa 2-0 nila nga bentaha sa "best-of-five" finals series sa 13th Cebu Schools Athletic Foundation Inc. (CESAFI)  basketball event  niadtong Huwebes sa gabii didto sa Cebu  Coliseum.
 Human sa ilang  65-52 nga kadaugan atol sa Game-1 niadtong Huwebes, si Landry  Sanjo ug ang kombinasyon nilang Monbert Arong ug Mark Jayven Tallo maoy daku'g natabang ning higayona dihang ang SWU miinat sa ilang walay pildeng baraha ngadto sa 14 ug usa na lang ka daog ang kuhaon nila aron mapanalipdan ang ilang korona nga nakuha nila human gipilde ang UV sa miaging season.
 Ang 'King Cobra' nga si Sanjo mipakita sa iyang kabangis diin mihimo siya'g double-double pinaagi sa iyang 20 puntos ug 18 ka rebounds uban ang tulo ka block shots, si Arong mitikdol og 16 puntos, tulo ka assists ug duha ka rebounds, samtang si Tallo mitimang og 10 puntos uban ang walo ka rebounds ug upat ka assists alang sa Cobras.
 Ang Lancers nagpaalot sa tuyo nga masumpo nila ang ilang demalas batok sa Cobras ning tuiga, apan ang ilang suwerte alang lang sa duha ka kuwarter ug tunga. Ang Lancers katapusang mipakita og maayong labok sa iskor nga 41-43 sa tunga-tungang bahin sa third period kay ang Cobras mibugwak og 15-0 run lakip ang 3-pointer ni Tallo nga naghatag kanila og komportabling 17 puntos nga bentaha, 58-41 sa nahabiling 1:24 sa duwa.
 Atol sa mainitong rally sa SWU, ang top wingmang sa UV nga si Francisco Arong gipagawas sa korte tungod sa  gihimo niyang "disqualifying foul" batok ni Monbert Arong sa katapusang 2:14 sa maong kuwarter.
 Gikan niadto, nausab ang duwa sa Lancers. Katapusan silang nakasikit sa iskor nga 60-67 dihang si Sanjo miposa og upat ka sunod-sunod nga puntos aron hungitan ang Cobras og 11 puntos nga labaw, 71-60 sa nahabiling 1:31 sa duwa. Ang buzzer-beating lay-up ni Tallo maoy miselyo sa kadaugan sa Cobras.
 Bugtong si John Abad lang ang miiskor og double-digit alang sa UV pinaagi sa iyang 16 puntos.