Lumchicai, 2-0 na sa 3rd Barangay Captain's Cup

CEBU, Philippines - Ang kombinasyon sa Lumboy, Chicos ug Caimito (LUMCHICAI) mipupo sa ilang ikaduhang sunod-sunod nga daog pinaagi sa pagpilde sa Pajo, 55-41 sa seniors division sa "3rd Barangay Captain's Cup" basketball tournament niadtong Martes sa gabii didto sa bag-ong Ibabao-Estancia multi-purpose gym sa Mandaue City.

Igo lang gipauna ang Pajo sa sayong bahin sa first period, 2-0, ug human magtabla ang iskor, 2-all, wala na kini makalabaw pa kay ang Lumchicai mipatuasik og mga puntos kortesiya nilang Jack Lumapas ug Ruffy Abella aron moposte’g 16-10 paghuman sa unang 10 minutos sa duwa.

Naungot ang iskor sa Pajo hinungdan nga mitubo ang labaw sa Lumchicai ngadto sa 15 puntos, 10-25.

Didto na miirog ang iskor sa Pajo, 12-25 human sa basket ni Jeffy 'Fing' Argallo sa tunga-tungang bahin sa second period, apan si Abella nagmangtas diin miiskor kini'g 10 puntos, lakip na ang duha ka 3-point shots aron inaton pa ang labaw sa halftime, 35-17.

Nanghumot na ang tam-is nga kadaugan sa Lumchicai sa dayong sugod sa final period human sila molabaw og 23 puntos, 49-26 dihang walay hunong og pamupo’g puntos sila si Abella ug Lumapas, ning higayona uban na ni P. Dabon.

Bugtong lang nahimo sa Pajo ni coach Abner Cabahug mao ang pagkitkit sa labaw ug pag-alkontra nga dili na malubong pag-usab.

Ang bigman nga si Abella mipupo’g 16 puntos ug si Lumapas miani og 13 puntos aron pangulohan ang Lumchicai nga nagtangag na karon og 2-0 nga baraha.

Si Jojen Dayanan mipugnit og 19 puntos, samtang si Robby Cortes mipaksit og 12 puntos alang sa Pajo nga gisugat dayon og pilde sa una nilang duwa ning maong torneyo nga gipaluyohan ni Ibabao-Estancia Brgy. Capt. Carmelino 'Jun' del Mar Jr. ug sa Sangguniang Kabataan (SK) ubos sa liderato ni Jake E. del Mar.

Ang tinuig nga liga gidumala sa ilang committee chairman nga si councilor Jonathan dela Peña uban sa abag nilang Winston Ouano, Joel Cortes, Venrhey Calderon ug Bonyuk Bajamonde.

Puntos matag usa
LUMCHICAI (55) - Abella 16, J. Lumapas 13, L. Lumapas 8, Dabon 8, Iway 6, Villamor 4

PAJO (41) - Dayanan 19, Cortes 12, Gahi 4, Argallo 2, Asyong 2, Omandam 2

(BANAT NEWS)