GLYN Construction midaog na

 CEBU, Philippines - Midaog sa labing unang higayon sud sa lima ka duwa ang GLYN Construction  human ilang gipatapsingan ang Mawin's Kitchenette  sa iskor, 106-105 sa  elimination round sa AMBL Basketball Cup 2013 sa 40-Above division didto sa Vicente Sotto Memorial Gym sa Bryg. Punta Princesa, ning dakbayan.

 Sa laing duwa,  ang Blessel Enterprises milubong  sa RCAF ni Romy Faunillan sa iskor nga 121-92 alang sa ilang ikaupat nga daog  sud sa unom ka duwa.

 Init kaayo ang pagsugod sa GLYN, kinsa naglabaw og 11 puntos, 31-20 ubos sa pagtimon ni kanhi PBA star Gilbert Demape ug Rey Jumamil.  Ang Mawin's ni Sherwin Lequit  milusad og 31-24 rally aron mosikit sa iskor, 51-55, apan wala mosalir ang ilang mga paningkamot kay mibawos man ang GLYN. Ang undergoal basket ni Magat maoy nagbaswat sa GLYN ngadto sa usa ka lugas nga  kadaugan.

 Si Demape maoy nangu sa GLYN sa iyang game-high 39 puntos, gisundan ni ex-Jaguar Argiel Magat miabuno'g 18 puntos. Si Jumamil midugang og 16 puntos, samtang si Ric Arias miamot og 14 puntos.

 Ang Mawin's Kitchenette nga wala pa makatilaw og daog sa upat nga duwa gipangulohan nilang Rolly Catubig ug Lequit nga nagkumboya og 41 puntos.

 Sa laing bahin, ang Blessel nga padayong nag-una sa liderato uban ang 4-1 nga baraha gipangulohan ni ex-Cobra Cesar Ortega, kinsa miburak og  20 puntos, samtang si Glenn Birao mibugha'g 19 puntos. Sila si Ralph Bruzon ug Frankie Lastimoso miiskor sab og double figures.

 Si Epon Nacua maoy topscorer sa RCAF,  kinsa nagbitbit og 3-3 nga baraha. Silang Reggie Licanda ug Rommel Garcia nagkumboya ug 32 puntos ning maong torneyo nga gipaluyohan sab sa   Du Ek Sam (DES) ug LG Appliance Master. (BANAT BALITA)

PUNTOS MATAG USA

Unang duwa:

 GLYN (106) - Demape 39, Magan 18, Jumamil 16, Arias 14, Sanchez 8, Baclaan 5, Bucton 2, Mabatid 2, Pasana 2

 MAWIN'S (105) - Catubig 21, Sh. Lequit 20, Aparri 17, Adriatico 16, Rosal 16, Manzo 13, Mendoza 2

Ikaduhang duwa:

 BLESSEL (121) - Ortega 20, Birao 19, Bruzon 17, Lastimoso 15, Maraño 11, E. Ferrer 10, Grafe 10, Ocampo 6, Galon 6, Lawas 2, Yares 2, T. Ferrer 2

  RCAF (92) - Nacua 17, Garcia 16, Licanda 16, Del Campo 10, Dinampo 7, Rodil 7, Ybañez 6, Tabasa 5, Faunillan 4, Ciabo 2, Baclay 2