Kapin sa 23T runners dagan sa 37th Milo Marathon

CEBU, Philippines -  Sa gilauman, mikapin na sa 23,000 runners ang nikompirmar sa ilang partisipasyon sa Cebu leg sa 37th  National Milo Marathon nga mosikad sayo sa buntag ugma diha sa Cebu  City Sports Center.

 Natabonan ang kapin sa 21,000 runners nga nidagan sa miaging tuig.

 Bisan pa niini, si race organizers Rio dela Cruz sa RunRio ug Cebu leg organizer Ricky Ballesteros naglaum nga mosaka pa ngadto sa 25,000 runners ang magginukdanay sa Milo Marathon, ang labing dakung lumba gawas sa Manila.

 "Twelve years in Cebu na din ang Milo Marathon.This is the biggest race outside Manila. We have surpassed the number of entries last year of 21 thousand. Currently we have 23 thousand and we’re expecting even more," matud pa  ni  Milo Sports Executive Andrew Neri sa press conference kagahapon didto sa Sarrosa International Hotel sa Mabolo, Cebu City.

 Ang maayong balita, kay ang  top winners ipadala sa  internasyonal nga mga  lumba.

 "We’re doing this basically to continue with our vision of grassroots development and bringing back the glory of Filipino runners in marathons abroad as well as molding new champions in the future,” dugang pa niya.

 Sa pagka karon, adunay 563 ka entrante sa 12-under 3 kilometer run, 20,950 sa 5K, 570 sa 10K ug 1,290 sa 21K.

 Si defending Cebu leg champion  Mary Joy Tabal  pabor gihapon nga maoy molangkat sa korona sa women's 21K, samtang sa men's division dili pa matino kun kinsa ang palarang modaog.

 Gawas sa  garbo ug premyo nga gitagana sa National finals, ang 2013 Milo Marathon King and Queen hatagan og katungod nga morepresentar sa nasud alang sa 2014 Paris Marathon nga gikatakda sa Abril 13.

 Ang top runners sa tanang kategoriya sa Cebu leg makadawat og ganting salapi ug tropeyo o medalya.

 Gawas sa pagpangita og mga international star ugma damlag, ang Milo padayon gihapon nga ilang advocacy program paghatag og mga sapatos ngadto sa deserving school children lukop nasud.

 Dinhi sa Sugbu, adunay 500  ka parisan sa sapatos ang gitunol ngadto sa lima ka piniling eskwelahan alang ning tuiga nga naglakip sa Marigondon National High School, Don Sergio Osmeña Sr. Memorial National High School, San Nicolas Elementary School,

Simeon Ayuda Elementary School ug Pusok Elementary School. (BANAT PALARO)