UV Baby Lancers midaog na

CEBU, Philippines -  Mihimo og  bag-ong lakang   ang  University of the Visayas (UV) Baby Lancers ug mi-epekto kini dihang ilang gipanitan ang Cebu Eastern College (CEC) Dragons, 79-59 pagsugod sa second round sa semifinals sa  13th   Cebu Schools Athletic Foundation, Inc. (CESAFI) kagabii didto sa Cebu Coliseum.

Ning pagsuwat, padayon pang nagduwa ang defending champion Sacred Heart School-Ateneo de Cebu (SHS-AdC) Magis

Eagles batok sa University of San Carlos (USC) Baby Warriors.

 Sukwahi sa miaging tulo ka duwa sa first round, diin wala sila modaog,  ang Baby Lancers  yano kaayong mipupo'g mga puntos ug walay nakapugong ni June Kent Manzo III sa iyang pagmangtas aron maoy mangulo sa opensa nga adunay 26 puntos, kadaghanan niini iyang nahimo sa second half lakip ang pipila ka three-point plays didto sa third period diin didto sab sila magsugod og inat sa ilang labaw. Gitapos sa Baby Lancers ang maong period sa iskor nga 57-41.

 Ang Baby Lancers nagbitbit karon og 1-3 nga baraha sa second round ug kinahanglan mohimo sila og dakung milagro aron makarekober ug moabante sa finals.

 Si Prince Cañete midugang og 19 puntos, si Emmanuel Villamor miamot og 11 puntos ug si John Carl Escalona miabuno og 10 puntos alang sa Baby Lancers.

 Ang 3-1 nga Dragons gipangulohan ni Marc Obado, kinsa mibugwak og 14 puntos, apan wala makahuygo  silang Mark Roa, Alfonso Alvizo ug Shann Christopher Tan. (BANAT PALARO)