Spike Sports V-League sugdan karong adlawa

CEBU, Philippines - Mosikad na karong adlawa ang Spike Sports Volleyball League nga uloha’g “Innodata-Skywalkers Cup 2013” diha sa Innodata multi-sport court sa Lopez Jaena st., Mandaue City.

Siyam ka teams sa men’s ug women’s divisions ang magtigi sa first conference.

 Ang host Innodata maoy mangulo sa men’s division nga naglakip sa Aegis, People Support, Convergys TGU and iBanawa, Accenture, EPCIBECC-BDO, ePerformax, Lexmark ug Stream.

 Gawas lang sa Convergys ug Stream nga moparada lang og usa ka team, tanang koponan aduna say ilang mga entrante sa women's division. Ang Qualfon ug Calltek maoy mokompleto sa moduwa ubos sa women’s division.

 Ang torneyo pagaduwaon lang matag weekends ug gikatakda kining matapos sa Oktubre 19.

Si Skywalkers Club president Gab Babista, kanhi volleyball varsity player sa University of Sto. Tomas nga team leader karon sa Convergys miingon nga ang eliminasyon mosubay sa single-round robin format, diin ang team nga maka-sweep magbaton og “twice-to-beat” advantage sa semifinal round.

 Sa laing bahin, si Babista ug Spike Sports ni lawyer Joseph Gonzales mapasalamaton ngadto sa Innodata

pinaagi sa ilang sports manager Vincent Joel Gagno sa pagpagamit libre sa ilang facility alang niining kalihukan.

 Gumikan niini, si Babista miingon nga mohatag sila’g ganting salapi ug mga tropeyo ngadto sa top performers. (BANAT PALARO)