ALA-Cobra fight card sa Balamban

 CEBU, Philippines - Nagpanikad na si Cebuano featherweight contender Jimmy 'Popeye' Paypa (13-2, 4KOs) sa umaabot niyang away batok ni Jason Redondo (7-1, 6KOs) sa Ormoc City sa ALA Promotions-Cobra Energy Drink "Tunay na Lakas Boxing" karong Septiyembre 25 didto sa Balamban Sports Complex.

 Ang 20-anyos nga si Paypa maoy usa sa mga labing init nga prospects gikan sa ALA Boxing Gym human sa

iyang 11 ka sunod-sunod nga daog diin ang katapusan niyang biktima mao si Cristian Abila niadtong Hulyo 21 didto sa Bacolod City.

 Si Paypa usa sa ALA Gym boxers nga mobida sa "IDOL" ang bag-ong boxing series sa ALA Promotions ug

ABS-CBN.

 Sa iyang bahin, si Redondo dili angay'ng kompiyansaan tungod kay tinguha kining moiskor   og laing knockout nga kadaugan.

 Sa supporting bout, ang veteran ug ring comedian nga si Jojo 'Flash' Entor makigsangka sa mas batan-on nga si Nelson Sandal.

 Duha ka Japanese boxers nga sila si Takaoki Naoma ug Yosuke Miyagawa moaway usab batok sa tagsa- tagsa nila ka mga Pinoy nga kaatbang sa undercards.

 Si Naoma makigbatok ni Leo Santisima, samtang si Miyagawa makigbinukbukay ni Crispin Parba.

Mokompleto sa fight card mao ang sangka nila ni Kim Galon batok Marlou Talili ug Raul Yu batok Hector Rojoca. (BANAT PALARO)