Sinukmagay sa Balamban

CEBU, Philippines -  Suwayan ni Omega Boxing Gym stalwart Virgilio 'Maton' Silvano (16-2, 10KOs)  pagsakmit sa bakanteng WBO Asia-Pacific light flyweight title sa iyang pakigsangka  ni Jetly Purisima (17-12, 5KOs) karong gabii didto sa Balamban Sports Complex.

 Ang garbo sa Dalaguete, Cebu nga si Silvano nga maoy nagkupot sa Philippine Boxing Federation (PBF) light flyweight belt lab-as pa sa iyang "unanimous decision" nga kadaugan batok ni Louie Ardos didto sa iyang lungsod.

 Ning higayona, si Silvano,  23-anyos mag-atubang og lisud nga hagit kay usa ka beterano si Purisima ug taas na'g kasinatian sa pag-away dinhi sa Pilipinas ug gawas sa nasud.

 Sa supporting main event sa boxing promotion nga gipasiugdahan sa International Pharmaceuticals  Inc. (IPI), ang kanhi WBO super flyweight champion nga si Marvin 'Marvelous' Sonsona (16-1, 13KOs) mohimo sa iyang "comeback fight" batok ni Jason Egera (21-8, 10KOs).  Ang undefeated flyweight contender nga si Froilan 'Sniper' Saludar (16-0, 11KOs) makigbinukbukay  ni Julios Alcos (21-12, 3KOs).