Brooks midemolis ni Abucayan

CEBU, Philippines - Gibarugan ni Cebu-based British fighter Cris "Lindol" Brooks sa Yaw-Yan ArDigma ang iyang ring name human iyang gitay-og ang Davaoeño nga si Lloyd Abucayan sa Mindanao's Beefit Pythons Pit aron maangkon ang bakanteng Ground and Pound Championship (GPC) heavyweight title sa main event sa ‘Ground and Pound 7:Resolution’ kagabii didto sa Cebu Coliseum.

Gidominaran sa Briton ang maong away gamit ang iyang striking aron pildehon ang wrestling expert nga si Abucayan.

Mipakita hinuon sa iyang kaisug ang 18-anyos nga si Abucayan ug nakalahutay kini sa first round, apan susama ra gihapon ang nahitabo sa misunod nga round tungod kay gilatos ra gihapon siya ni Brooks.

Gidawat ni Abucayan ang tanang kusug nga elbow strike ni Brooks gikan sa mount position nga maoy nakapaaghat ni referee Junaz Azarcon nga hunungon na ang away sa 2:37 sa second round.

 â€œHe was a tough kid (Abucayan) but I came to get that belt and I am just happy that I made it,” matud pa ni Brooks kinsa mipalambo sa iyang record ngadto sa 3-0.

“I may not be a Filipino but this fight is for Cebu. I promised you guys that it will stay here in Cebu and I kept my promise. This is just the start and hopefully I can defend my title for a long time.”

Dili lalim ang gidawat nga kastigo ni Abucayan kinsa pipila ka minuto nga naghigda sulod sa ring sul-ob ang oxygen mask. Gidala usab siya sa duol nga tambalanan aron tambalan ang iyang injury.

Sa supporting main event, milampos ang taga-Mindanao nga si Lorde Rey "Punisher" Yamit sa pagdepensa sa iyang GPC lightweight title pinaagi sa rear naked choke batok sa Cebuano nga si Kru Robert “Maldito’ Serdone.

Sama ni Yamit, nakuha usab sa laing taga Mindanao ug kanhi URCC champion nga si Victor “Gladiator’ Torre ang GPC flyweight title human niya balii pinaagi sa armbar si Cebuano fighter James ‘Spider’ Serenio sa first round.

Sa nag-inusarang kickboxing match, si Yaw-Yan Fighting Challenge (YFC) champion Renante "Limbas" Noblefranca  mikulata ni Marjun "Muma Warrior" Porriento kinsa misurender sa 1:57 sa first round.

Mokumpleto sa mananaug sa undercard mao sila si Mark ‘Terminator’ Araneta kinsa mipaundang ni Rik ‘Hammer’ Cubillas; Frederick ‘Spider Lim nga mituok ni Maxlito ‘Hyper Eagle’ Yong , Rocky Tune ‘Outlaw’ Batolbatol mikastigo ni Ervin ‘Zombie’ Mosico , Alex ‘Pilot’ Abraham midesisyon ni Perkins ‘Predator’ Calixto, ,Ralp Loui ‘Silent Assassin’ Arcayan nga mipaluhod ni Jess ‘Alpa’ Catayas, Ismael ‘Tsunami Walk’ Gomez nga milupig sa puntosay ni Leo ‘Lion X’ Rodrigo ug Lemuel ‘Musang’ Maglinte nga nanginahanglan lang og 39 segundos aron tuk-on si John Edu ‘Excalibur’ Torbiso.  (BANAT SPORTS)