Cebu Blue Marlins nanghawod sa G-League swimfest

CEBU, Philippines - Ang Cebu Blue Marlins (CBM) nga gilangkuban sa mga banggiitang junior swimmers gikan sa nagkalain-laing eskwelahan maoy  migawas nga overall champion sa first leg sa 2013 SPEEDO G-League Long Course Swimming Championships  didto sa Iloilo City dili pa dugay.

Ang CBM ni coach Rolando Alvarez maoy nanghawod sa laing walo ka swimming clubs aron dominahon ang duha ka adlaw nga kompetisyon nga adunay 578 puntos. Ang Nautilus Swim Club mipahiluna sa ikaduhang dapit uban ang 547 puntos, samtang ang Iloilo Sea Warriors mipuwesto sa ikatulo sa ilang 496 puntos.

Mi-okupar sa ikaupat ang Capiz Swim Club bitbit ang 366 puntos, gisundan sa Bago City Swim Club nga adunay 314 puntos.

Ang 16-anyos nga si Timothy Yen sa  La  Jolla County Day School of California mikabkab og lima ka bulawan pinaagi sa 100m ug 400m freestyle, 200m individual medley, 200m backstroke ug 200m butterfly.

Si Michael Ichiro Kong sa University of Cebu (UC) mitunol og upat ka bulawan ug usa ka silver, samtang si Trina Caneda mibitbit   usa ka silver ug upat ka bronzes.

Ang managsuong Indaya nga sila si Karen Mae ug Jobert nagkumboya og tulo ka golds, usa ka silver ug tulo ka bronzes. Si Shane Allyne Prejo nidaog usa ka gold, usa ka silver ug usa sab ka bronze, samtang si Emma Alexandite Duroy mihakot og usa ka gold, duha ka silvers ug usa ka bronze.

Si Beth May Arellano mikubkob og tulo ka golds ug duha ka silvers, si Danielle Mae Ballesteros adunay duha ka golds ug duha sab ka silvers. Ang tinun-an sa Bright Academy nga si Jehaosh Reigh Garrido mitunol og usa ka gold ug duha ka silvers, samtang si Justine Reigh Garrido sa St. Theresa’s College adunay tag-usa ka gold ug bronze.

Nakatampo sab og daku si Val Andre Chiu sa Sacred Heart School-Ateneo de Cebu pinaagi sa iyang upat ka golds ug usa ka silver.

Si Aaron Grant Embuscado sa University of San Carlos-North Campus mitapos sa iyang kampanya bitbit ang usa ka gold, usa ka silver ug tulo ka bronzes, samtang si Tara Kyle Ebon sa USC-South Campus midaog tulo ka silvers ug usa ka bronze. Si Rafael John Dacaldacal sa Maternelle Academy mitunol usa ka gold ug usa ka bronze.

Gipamatud-an ni Micah Marie de la Serna sa Tabunok nga angayan siyang masakop sa CBM human misakmit og duha ka golds, duha ka silvers ug usa ka bronze.

Gitapos sa CBM ang ilang kampanya pinaagi sa pagdaog og usa ka gold ug usa ka silver sa 4x50m relay kortesiya nilang Michael Ichiro Kong, Val Andre Chiu, Timothy Yen ug Aaron Grant Embuscado alang sa gold ug nilang Trina Caneda, Danielle Mae Ballesteros, Micah Marie dela Serna ug Karen Mae Indaya sa silver.