Dragons mitiklo sa Panthers

CEBU, Philippines - Naghangad gihapon ang Cebu Eastern College (CEC) Dragons sa kamangtas ni Mark Roa  dihang nidaog kini batok sa University of Southern Philippines Foundation (USPF)  Baby Panthers, 94-82 sa secondary match sa nagpadayong aksiyon sa 13th Cebu Schools  Athletic Foundation Inc. (CESAFI) basketball event gabii didto sa Cebu Coliseum.

MGA DUWA UGMA

(USC gym)

1:00 pm -- DBTC vs. USC (jrs.)

2:45 pm  -- USJ-R vs. USPF (jrs.)

4:00 pm --USJ-R vs. USPF (srs.)

6:15 pm  --USC vs. UC (srs.)

Ning pagsuwat, ang University of the Visayas (UV)  Green Lancers padayon pang nakighamag sa Cebu Institute of Technology-University (CIT-U) Wildcats.Si Roa mibugwak og 26 puntos alang sa Dragons nga milamo-lamo pagtukob sa ilang ikalimang daog sa pito nila ka duwa.

Ang Dragons milublob karon sa ikatulong dapit sa overall nga nagtangag og 5-2 nga baraha.

Sa kasamtangan, ang walay pildeng Sacred Heart School-Ateneo de  Cebu (SHS-AdC) Magis Eagles ang nag-una sa liderato bitbit ang 7-0 nga baraha, nagsunod ang Univerity of the  Visayas (UV) Baby Lancers nga adunay 6-2 nga baraha.

Gawas ni Roa, sila si Alfonso Alvizo ug Chris Mar Salac ang miiskor og 13 puntos alang sa Dragons nga miposte sa labing daku nilang labaw nga 26 puntos, 75-49 paghuman sa third period.

Apan wala nila mamentinar ang momentum kay ang Baby Panthers nagmangtas sa final period diin ilang gikalingawan og kitkit ang dakung labaw hangtod nga nahiyos kini ngadto na lang sa 12 puntos, apan didto ra kutob ang maayo nilang labok kay nahutdan sila sa oras.

Si Airam San Cantillas mitusak og unom ka triples sa kinatibuk-an niyang 31 puntos, apan, bugtong si Jour James Villamor lang ang miabag kanila sa opensa nga mitusik og 17 puntos.

PUNTOS MATAG USA

CEC (94) - Roa 26, Alvizo 13, Salac 13, Buli-buli 9, Obado 8, Chi 6, Sabroso 5, Berdera 4, Magnaong 4, Ibot 3, Pagalan 2, Bughao 1

USPF (82) - Cantillas 31, Villamor 17, Bahe 8, Pepito 7, Bahio 4, Damolao 4, Espinosa 3, Aguirre 2, Oretga 2, Pagasian 2, Isok 1