UV Baby Lancers nakaipsot sa CIT-U Wildkittens
CEBU, Philippines - Miiskor na sab og lisud nga kadaugan ang University of the Visayas (UV) Baby Lancers, ning higayona batok sa idlas nga Cebu Institute of Technology-University (CIT-U) Wildkittens, 75-73 sa secondary match sa 13th Cebu Schools Athletic Foundation Inc. (CESAFI) kagahapon didto sa Cebu Coliseum.
Ang split charities ni Dominic Jan Morre maoy nakaluwas sa UV Baby Lancers, kinsa mitapos sa elimination round uban ang 6-2 nga baraha.
Mipahiluna ang Baby Lancers sa ikatulo nga dapit sa overall sunod sa walay pildeng Sacred Heart School-Ateneo de Cebu (SHS-AdC) Magis Eagles (7-0) ug sa Cebu Eastern College (CEC) Dragons (4-2).
Usa na usab kini ka low scoring nga kadaugan alang sa Baby Lancers, kinsa naglisod sa miagi nilang duha ka kadaugan. Una batok sa University of Cebu (UC) Webmasters, 80-77 ug sa Don Bosco Technology Center (DBTC) Greywolves, 55-52 niadtong Domingo.
Ang Wildkittens mipatuman og "zone defense" nga nakatabang kaayo kanila ilabi na sa himalatyong oras dihang ang guwardiya sa Baby Lancers nga si John Carl Escalona mihimo'g errant pass sa katapusang 13.2 segundos ug naglabaw lang sila'g usa ka palito, 73-72 ug ila ang ball possession.
Apan ang Wildkittens nakahimo sab sa ilang kaugalingon sayop dihang si Benedict Nazareno naabtan sa five-second inbound violation hinungdan nga nabalik ngadto sa Baby Lancers ang posisyon.
Ang Wildkittens napugos paghimo'g foul aron mahunong ang oras ug mihatod ni Morre ngadto sa foul line nga mipasud lang og usa ka free throw, 74-72. Nakahimo sab og laing sipyat ang Wildkittens nga nakapaseguro sa kadaugan sa Baby Lancers.
Ang Baby Lancers gipangulohan ni June Kent Manzo, kinsa miposa og 25 puntos, samtang sila si Ernesto Limitares ug Escalona miamot og 13 ug 12 puntos matag usa.
Sa laing bahin, ang Wildkittens gipangulohan sab ni
Stanley Hapin pinaagi sa iyang 19 puntos, gisundan ni Jessie Aloro nga adunay 18 puntos. (BANAT NEWS)
- Latest
