T.D.M.U., Eskina riders miabante semifinal sa PMODA tourney

CEBU, Philippines -  Nakompleto na ang upat ka teams nga moduwa sa semifinal round human sa buwag nga kadaugan sa T.D.M.U. ug Eskina riders batok sa tagsa-tagsa nilang karibal sa Pulpogan Motorcycle Owners and Drivers Association (PMODA) Conference 3 Habal-Habal basketball tournament sa managlahing adlaw didto sa Barangay Pulpogan gym sa lungsod sa Consolacion, Cebu.

 Ang T.D.M.U. drivers miangkon sa ikatulong lingkoranan sa semis human nila  tiwasi ang Calamarez riders ni team manager Marcelo Avelardo sa Game-2 sa ilang "best-of-three" series sa quarterfinals niadtong Martes.

 Ang kadaugan gipangulohan ni William Alegado nga mirumbo og 17 puntos, gisundan ni Warren Barro nga adunay 14 puntos. Ang team manager nga si Romero  Gallardo mitampo og 13 puntos alang sa iyang koponan nga makigsangka sa haring gangis nga Fooda riders ni team manager Jojo Colita sa semifinals "best-of-three" series.

 Si Kenneth Bihag mikimada og 20 puntos aron pangulohan ang natagak nga Calamarez riders. Si Mario Pepito mitikdol og 11 puntos, samtang sila si Julie Lasdoce ug Ismael Reuyan mitimbre og 10 puntos matag usa.

 Sa laing bahin, ang Eskina riders nakabangon human masukamod dihang ilang gilubong ang gikalisangan nga Ghost riders, 77-66 sa Game-3 sa kaugalingon nilang series aron sakmiton ang katapusang luna sa semis niadtong Miyerkules.

 Sa gilauman, ang tandem nilang Amay Cabilan ug Joseph Lleve mao gihapon ang nagmaneobra sa Eskina riders nga nagkumboya og 49 puntos. Si Cabilan mikadlit og 26 puntos, samtang si  Lleve miarangkada og 23 puntos alang sa Eskina riders ni team manager Ingkoy Along.

Ang Ghost riders ni team manager Allary 'Al-Al' Pepito Alegado gipangulohan sab ni Roel Bangcal, kinsa mipahaguros og 24 puntos ug Elizar Personal nga miabuno'g 14 puntos.

 Sugdan ang Game-1 karong adlawa diin ang T.D.M.U. ug Fooda ang unang mag-abot sa alas-4 sa hapon ug sundan dayon sa duwa tali sa District 4 riders ni team manager Luther Hopida ug Eskina riders sa alas-5 sa hapon.

 Ang torneyo nga gipasiugdahan ni Jerry Narandan, gipaluyohan ni Pulpogan Brgy. Capt. Roger R. Linaboc ug sa iyang mga  konsehales nga silang  Avelino Bihag, Adrian Isoto, Geroncio Azucenas ug Raymond Villanueva.

PUNTOS MATAG USA

Unang duwa:

 T.D.M.U. RIDERS (68) - Alegado 17, Barro 14, Gallardo 13, Colita 8, Tito 6, Neil 4, Tugade 4, Apatan 2

 CALAMAREZ RIDERS(61) - Bihag 20, Pepito 11, Lasdoce 10, I. Reuyan 10,  Lauron 4, Semblante 2,

Bontilao 2, A. Reuyan 2

Ikaduhang duwa:

 ESKINA RIDERS (77) - Cabilan 26, Lleve 23, Noquiao 8, Ducay 4, Camay 4, Sunggayan 4, Villamor 2

 GHOST RIDERS (66) - Bangcal 24, Personal 14, Capangpangan 8, Rosales 8, Bacalso 6,  Peña   4,

Lambino 2