"IDOL" boxing series subhan na

CEBU, Philippines -  Bunyagan na ang "IDOL" television boxing series nga gidalit sa ALA Promotions ug ABS-CBN Sports karong gabii didto sa Escalante City Coliseum sa Negros Occidental nga bidahan sa duha ka undefeated ALA fighters nga mosukod sa  Indonesian nilang kaatbang.

 Sila si super flyweight prospect  Melvin 'Topgun' Gumban ug super bantamweight contender Mark Bernaldez mopamatuod nga angayan silang ilhon nga mga bag-ong paglaum sa ALA Gym nga mohatag og mga world champions sa nasud.

 "They are both in excellent condition for this fight. Nag-expect ko nga mo-deliver sila og knockout karon," matud pa ni  ALA chief trainer Edito Villamor.

 "Daku og potensyal sila si Gumban ug Bernaldez, but they still have to answer the challenge if they have what it takes to go big time. Time na ni nila nga ipakita ang ilang hardwork sa gym."

 Ang 23-anyos nga si Gumban  (14-0, 6KOs) tinguha mohimo'g impresyon atubangan sa iyang mga katagilungsod sa iyang  pakigsangka  ni John Bajawa (11-4, 6KOs).

 Si Gumban nga lab-as pa sa iyang "unanimous decision" nga kadaugan batok ni Fernando Ocon niadtong Mayo 4 didto sa Mandaue City Plaza Square, kompiyansa nga modaog sa labing una niyang langyaw nga kaatbang.

Sa iyang bahin, si Bernaldez (10-0, 6KOs) moharong ni Marangin Marbun (12-10, 9KOs), usa ka veteran Indonesian fighter nga gikasangka kaniadto sa retiradong ALA boxer Rey 'Boom Boom' Bautista.

Kini ang ikaduhang sangka ni Bernaldez batok sa Indonesian fighter human sa iyang second round KO nga kadaugan batok ni Arief Blader niadtong Abril 20 didto sa University of Southeastern Philippines (USEP) gymnasium sa Davao City.

 Sa supporting bouts, sila si Ralph Lulu (8-0,3KOs) ug Jessel Mark Magsayo (2-0, 2KOs) mosuway pag-inat sa ilang daog dihang ilang sangkaon silang   Ronerex Dalut (8-11, 2KOs) ug John Rey Melligen (2-0, 1KO).

 Mokompleto sa fight card mao ang away ni Richard Barrios batok Ryan Canillas, Kim Galon batok Rico Eugis, Japanese Kazuma Ejiri batok Jerome Baja, Geo Santisima batok Roniel Parcon ug Raul Yu batok Diomedes Semella.