PHL nangandam sa dakung gubat
CEBU, Philippines - Nangandam na ang Pilipinas alang sa dakung gubat dihang sangkaon nila ang New Zealand sa Davis Cup Asia/Oceania Zone Group II finals sa Septiyembre 13-15 didto sa Plantation Bay Resort and Spa sa Lapu-Lapu City.
"It's the first time that we will be playing against a non-Asian team and New Zealand is tough. The fact that they made it to the finals only shows how good they are as a team," matud pa ni Davis Cup Philippine Administrator Randy Villanueva atol sa pinirmahay sa "memorandum of agreement" kagahapon didto sa Savannah lounge sa maong resort.
Uban ni Villanueva sa MOA signing mao sila si Lapu-Lapu City Mayor Paz Radaza, Councilor Don Harry Radaza, Plantation Bay Vice President for Marketing Efren Belarmino ug acting General Manager Nenette Castillon.
Matud pa ni Villanueva nga adunay dakung purohan nga modaog ang Philippines kay sinati na sila sa playing court.
Ang modaog sa Philippines-New Zealand match ituboy ngadto sa elite Group I sa 2014 season. Ang Phl nahagba gikan sa Group I human makaangkon og sunod-sunod nga kapildihan ngadto sa Japan ug Chinese-Taipei niadtong 2011, apan midaog batok sa Syria, 3-2 ug Thailand, 4-1 niadtong Abril.
Ang 42-ranked Philippines mipahimulos og 3-2 nga bentaha batok sa New Zealand, ang 39th best nation sa Davis Cup rating sa niagi nilang lima ka duwa, apan ang Kiwis mipatigbabaw batok sa Pinoy nilang karibal pinaagi sa 5-0 shutout sa katapusan nilang panagsangka duha na ka ang nakalabay.
Ang Fil-Ams Treat Conrad Huey ug Ruben Gonzales gipaabot nga maoy mangu sa kampanya sa nasud ning tulo ka adlaw nga torneyo uban nilang Johnny Arcilla, Francis Casey Alcantara ug Jeson Patrombon.
Sukdon nila ang katakus nilang Dan King-Turner, Artem Sitak ug Marcus Daniell, kinsa giisip nga mas labaw kanila sa world rankings. (BANAT NEWS)
- Latest
