TDMU, Eskina Riders miangkon sa Game-1

CEBU, Philippines - Mapasigarbuhon ang nangiwit nga T.D.M.U. Riders tungod sa ilang pagpilde sa topseed Calamarez Riders, 75-72 aron maangkon ang Game-1 sa "best-of-three" quarterfinals sa Pulpogan Motorcycle Owners and Drivers Association (PMODA) Third Conference Habal-Habal basketball tournament niadtong Sabado didto sa Pulpogan gym sa lungsod sa Consolacion, Cebu.

 Naggukod ang T.D.M.U. gikan sa pagsugod sa duwa hangtod sa tunga-tungang bahin sa fourth  quarter. Didto na sila nakarekober sa katapusang singko minutos dihang milusad kini sa ilang mainitong rally sa pagpangulo ni William Alegado nga mitusak og duha ka three-pointer nga maoy nakapatabla sa iskor, 68-all.

 Mipatuman og "man-to-man" ang Calamarez, apan wala kaayo mosalir ang ilang diskarte kay ang higante nilang si Jessel Gungob wala na mo-guwardiya og maayo kay nakakubit na'g upat ka fouls sa 4:44 pa lang sa final period.

 Gumikan niini, mikiat ang tandem nilang team manager Romero Gallardo ug Alegado uban ni Warren Barro aron giyahan ang T.D.M.U. paingon ngadto sa baba sa kadaugan.

 Si Alegado  maoy topscorer sa kadaugan nga miarangkada og 24 puntos, samtang sila si Gallardo ug Barro miratsada og 11 puntos matag usa.

 Ang nadisgrasya nga Calamarez Riders ni team manager Marcelo Avelardo gipangulohan sab ni Gungob nga mikadlit og 36 puntos, apan nakawang lang ang iyang mga paningkamot kay nasugamak ang koponan niya. Sila si Mario Pepito ug Ramil Trillo miariya og 10 puntos.

 Sa sayo pa, nakuha sab sa Eskina Riders ni Ingkoy Along ang Game-1 human nakaipsot sa kulbahinam nga duwa, 72-70 batok sa Ghost  Riders ni Allary 'Al-Al' Pepito Alegado.

 Tulo ka players sa Eskina  Riders ang mihimo'g double figures sa pagpangulo ni Amay Cabilan nga mibagnos og 21 puntos. Si Joseph Lleve mipasada og 21 puntos, gisundan ni Brian Villamor nga adunay 14 puntos.

 Sikit ang maong aksiyon diin ang duha ka koponan nagbanos-banos og pamuntos gikan sa pagsugod hangtod sa final period, apan sa kaulahian ang Eskina Riders maoy mipatigbabaw sa duwa.

 Ang Ghost Riders daku unta'g purohan nga makatabla ug posibleng mahatod  pa ang duwa ngadto sa overtime dihang biya lang sila og dos puntos, 70-72 sa nahabiling 12 segundos, apan si Elizar Personal napalpak sa iyang krusyal kaayong lay-up hinungdan sa ilang pagkahugno.

 Si Personal maoy nangulo sa Ghost Riders nga mikutlo'g 19 puntos, samtang si Roel Bangcal miugkat og 17 puntos.

 Sa maong mga kadaugan, ang Eskina ug T.D.M.U. Riders nagkinahanglan na lang og usa ka  daog aron hingpit na moabante sa semifinals ning maong torneyo nga gipasiugdahan ni Jerry Narandan uban sa suporta ni  Pulpogan Brgy. Capt. Roger R. Linaboc ug sa iyang mga  konsehales nga silang  Avelino Bihag, Adrian Isoto, Geroncio Azucenas ug Raymond Villanueva.

Puntos matag usa

Unang duwa:

 ESKINA RIDERS (72) - Cabilan 21, Lleve 20, Villamor 14, Sunggayan 8, Noquiao 4, Camay 3, Ducay 2

 GHOST RIDERS (70) - Personal 19, Bangcal 18, Bacalso 8, Dizon 8, Capangpangan 7, Peña 5, Rosales 4, Salva 2

Ikaduhang duwa:

 T.D.M.U. (75) - Alegado 24, Gallardo 12, Barro 12, Apatan 9, Colita 8, Orcullo 6, Tugade 4

 CALAMAREZ (72) - Gungob 36, Pepito 10, Trillo 10, Santosidad 6, A. Reuyan 4, Bontilao 4, I. Reuyan 2 (BANAT NEWS)