Goldberry Suites 6-0 na sa shaabaa
CEBU, Philippines - Wala gihapo'y pilde ang Goldberry Suites human sila modaug batok sa Gaisano Capital sa iskor, 59-43 alang sa ilang ikaunom nga sagunson nga daog sa miaging weekend sa nagpadayong Sacred Heart Ateneo Alumni Basketball Athletic Association (SHAABAA) didto sa Sacred Heart School-Ateneo de Cebu basketball courts sa Gen. Maxilom avenue, ning dakbayan.
Nagmangtas si Dave Lim, ang kanhi MVP sa makadaghan nga higayon sa maong torneyo, mihakot og 14 puntos uban sa iyang 13 ka rebounds, upat ka assists, upak sab ka steals ug duha ka blocked shots. Si Paulsen Uy miabag kang Lim pinaagi sa iyang 11 puntos og lima ka rebounds ug ingon man sab upat ka assists sa lain na sab nilang pagdominar sa torneyo diin sila mao karo'y solo leader sa ilang 6-0 nga baraha.
Ang Gaisano kinsa nakigtabla karon sa ikatulong pwesto uban sa Milco human sa ilang 73-64 nga kadaugan batok sa San Jose Bakeshop, 73-64. Sa maong duwa, silang Justin Osmeña, Theogene Lim ug Roderick Mangubat maoy nangu sa Milco dihang pulos sila mibahug og double figures alang ilang 4-2 nga baraha uban sa Gaisano Capital and Milco.
Sa laing bahin, nagtabla sab sa ikaduhang pwesto ang RDAK Transporters ug ang Insular Square human sila modaug batok sa tagsa-tagsa nila ka kaatbang sa labing uwahi nilang duwa. Giligsan sa RDAK ang A-Team, 60-49 samtang gibiktima sa Insular Square ang walay daog nga San Remigio Aguilas, 70-47.
Si Leigh Dixon maoy nangu sa Insular sa iyang 20 puntos uban sa iyang 11 ka rebounds ug upat ka assists samtang si Ed Macasling nagpadayon ang maayog duwa diin usa na lang unta ka rebounds aron siya makahimo'g labing unang triple-double sa kasaysayan sa SHAABAA sa iyang 12 puntos, 10 ka assists ug siyam ka rebounds. Mihimo sab siya'g lima ka steals.
Ang RDAK ug ang Insular Square nagtabla karon sa ikaduhang pwesto sa ilang 5-1 nga baraha.
Sa lain pa gyu'ng duwa, midaug ang reigning champions Cebu Landmasters aron maghupot og 3-3 nga baraha human ilang gipukan ang Alberto’s Pizza, 71-54 diin maoy nangu sa ilang opensa si Franco Te pinaagi sa iyang 15 puntos samtang si Kyle Valmoria midugang og 11 puntos.
Ang A-Team ug ang San Remigio parehong wala'y daog sulod sa ilang unom ka duwa samtang igo lang nakalabaw og gamay ang Alberto’s Pizza sa ilang 1-5 nga baraha. (BANATSPORTS)
- Latest
