UV batok SWU

CEBU, Philippines -  Mabanhaw na  sab  ang karaang panagribal sa Southwestern University (SWU) Cobras ug University of the Visayas (UV) Green Lancers dihang magsangka  sila karon sa 13th Cebu Schools Athletic Foundation Inc. (CESAFI) basketball events diha sa  Cebu Coliseum.

 Ang SWU ug UV nga parehong nagbitbit og 2-0 win-loss records, mag-abot sa alas-6:15 sa gabii.

 Upat ka Cameroonian recruits ang mopakita sa ilang abilidad karong gabii ubanan sa   local players sa tagsa-tagsa nila ka teams nga magsilbeng mga supporting cast ning gipaabot nga dakung gubat.

 Sa miaging duha ka dagkung torneyo, gipukan sa Cobras ang Lancers lakip na niini ang Game-5 sa CESAFI sa miaging tuig ug ingon man sab ang Philippine Collegiate Champions League (PCCL)-Visayas.

 Karong gabii, suwayan sa Cobras pagpadayon pagdominar sa Lancers, kinsa naglungot-lungot usab nga mobawos.

  Ang modaog sa duwa karon  magsolo sa liderato nga magbitbit og 3-0 nga baraha.

 Ang tandem sa Cobras recruits  nga silang Fabrice Sewe ug Landry Sanjo mas pabor sa gidak-on ug gitas-on kun itandi nilang Steve Cedric Akomo ug Mike Harry Nzessue sa Lancers, apan dili pa matino sa pagka-karon kun kinsa gyud ang mosubang pag-ayo.

 Samtang gilauman nga daku'g papel ang tirador nga si Monbert Arong ug  playmaker nga si Mark Javyen Tallo nga maoy nangu sa ilang 76-70 nga kadaugan sa overtime batok sa University of San Carlos (USC) Warriors, dili sab malalis nga daku sab kaayo'g natabang silang Sewe ug Sanjo sa maong kadaugan tungod kay ilang napuhalan ang tandem nilang Ahmed Salihou ug Barry Amin sa Warriors.

 Angay sab atngan kun  kinsay makabentaha kanilang Tallo ug sa mas beteranong point guard sa Lancers nga si John Michael Abad.

 Ang kasamtangan nga line-up sa Cobras mas lig-on pa kun  itandi sa miaging tuig dihang nagduwa pa kanila silang Ben Mbala, Justin Aboude, Bonifacio Guillena III, Benito Ortuyo Jr. ug Joseph Nalos.

 Sa gitas-on ug gidak-on dili mabentahaan ang Cobras kay aduna sila'y back-ups nga silang Bernie Bregondo ug Daryl Goloran, kinsa makig-abin sa mga rookies nga silang Melvin Holper ug Rey Mark Akuno.

 Ang UV ni coach Felix 'Donbel' Belano Jr. moparada ni reigning MVP Hernal 'Wowie' Escocio ug versatile playmaker  John  Abad, uban nilang Arvie Cabanero, Chris Perolino, Vincent Mendoza, Angelo Babia, Alfred Codilla, Miko Marquez, Christian Fajardo ug Rhaffy Octobre.

 Sa dili pa ang UV-SWU showdown, unahon una ang tulo ka mga duwa sa juniors division diin ang CIT-U Wildkittens makighamag sa USPF Baby Panthers sa ala-1 sa hapon, ang USJ-R Baby Jaguars makiglayog sa CEC Dragons sa alas-2:45 sa hapon ug ang UV Baby Lancers makigsangka sa defending champion SHS-AdC Magis Eagles sa alas-4:30 sa  hapon. (BANAT PALARO)