Perino, Orbiso abante sa national finals sa Suzuki drag race
CEBU, Philippines - Ang Sugbuanong riders nga silang Neil Perino sa Suzuki-BMR ug Mipon Orbiso sa Racing Lion ang miabante ngadto sa national finals sa Suzuki Raider Breed Wars 2013-Battle of the Kings human midominar sa ilang tagsa-tagsa ka kategoriya sa regional elimination sa miaging weekend didto sa South Road Properties (SRP).
Si Perino wala pabangbang sa iyang pagratsada aron masakmit ang champion's trophy sa 130cc division.
Kini ang unang higayon sud sa walo ka tuig nga ang BMR misalmot sa drag racing ug dili katugot si Perino nga mapilde ang iyang koponan.
Gipilde ni Perino si Joven Millana sa Suzuki V-Man sa Mindanao alang sa unang dapit, samtang si Fitzgerald Sangual sa Petronas-Mackyworx mi-okupar sa ikatulo.
Sa iyang bahin, si Orbiso mao usab ang nanghawod sa 150 category human gipilde ang laing rider sa V-man nga si Anver Antonio, samtang si Oliver Aplaon sa EDG Tire Recapping mipahiluna sa ikatulo.
Wala hinuon masirohi ang V-man dihang ilang giharian ang 115 underbone category kortesiya ni Joven Millana.
Si Alvin Laspuna sa Matoy Racing miangkon sa ikaduha, samtang si Cris Anthony sa SBM Riders of Bohol mitapos sa ikatulo ning maong lumba nga gipaluyohan sa Phoenix Cyclo Max Motorcycle Oil ubos sa pagtugot sa National Motorcycle Sports and Safety Association (NAMSSA).
- Latest
