Stream padayong namupo og daog sa 9th CSCC E-League

CEBU, Philippines -  Padayon nga namupo og daog ang Stream Ingenyouity human ilang gipilde ang ePerformax Reds, 57-51 sa

nagpadayong aksiyon sa 9th CSCC E-League basketball tournament niadtong Sabado didto sa City Sports Club-Cebu

gym sa Cebu Business Park.

 Gipangulohan ang Stream ni Sylvester Millevo nga mipabuhagay og 19 puntos. Gawas  niini, si Millevo, kinsa

mihimo'g kasaysayan sa liga duha na ka tuig ang nilabay tungod sa pagdaog sa MVP ug Rookie of the Year" awards sa

usa ka  higayon, milangkat sab og unom ka rebounds alang sa Stream nga  nag-una sa liderato sa bracket B sa Northern

Conference uban ang 5-1 nga baraha.

 Ang ePerformax nga nakatilaw sa ilang ikatulong pilde sa unom ka duwa, gipangulohan usab ni Robert Gilo

pinaagi  sa  iyang  13 puntos uban ang  siyam ka rebounds.

 Sa laing duwa, ang Kyocera Frontiers midemolis sa Executive Boutique Lycans sa iskor  nga 75-35.

 Si Winston Stephen Panal miiskor og 17 puntos alang sa Kyocera, samtang sila si Ariel Ramonito Edera ug

Dinnel Cabiles miantog og 14 puntos matag usa.

 Sa laing bahin, ang Wipro Tigers mikulit og 4-2 win-loss record pinaagi sa default batok sa Talleco Bandits. (BANAT NEWS)