Jaguars mibihag sa Wildcats

CEBU, Philippines -  Gibutang sa University of San Jose-Recoletos (USJ-R) Jaguars sa kalimot ang dili maayo nilang agi sa

CESAFI pre-season games atol sa miaging Partner’s Cup diin usa lang ka daog ang ilang nahimo sulod sa unom ka duwa.

 Apan niadtong Martes, nakabihag dayon ang Jaguars human sa ilang impresibong kadaugan batok sa Cebu

Institute of Technology-University (CIT-U) Wildcats, 79-66 sa 13th Cebu Schools Athletic Foundation Inc. (CESAFI)

didto sa Cebu Coliseum.

 Gipamatud-an sa gamitoy'ng   rookie guard  Rendell Senining kinsa maoy labing gamay  nga dili diay tinuod sa

tanang higayon ang panultihon nga "height is might" sa natad sa basketbol  dihang   gipangulohan niya ang Jaguars pinaagi

sa iyang 19 puntos.

 Si Fletcher Galvez nakatabang sab og daku sa maong kadaugan diin miamot siya og 13 puntos ug silang

Miguel Tabaloc ug Christian Parker nga nagkumboya'g 22 puntos.

 Walay nakakuha'g dakung pabor sa duwa hangtod na didto sa fourth period diin nanginit ang Jaguars ug

nagmangtas   sa katapusang siyete minutos.  Niadtong tungora,  biya pa sila og sayes puntos, 51-57, apan  sa usa lang ka

pagpamilok ang Jaguars mipabuhagay og 13-0 run  aron mailog  ang labaw, 70-61 sa katapusang 2:15 sa basket ni

Galvez. Siya usab ang mihatag sa Jaguars sa ilang dakung labaw nga 13 puntos pinaagi sa iyang three-pointer, 79-66 sa

nahabiling 36 segundos.

 Ang rookie shooting guard nga si Joshua dela Cerna mihimo'g career-high 32 puntos  aron pangulohan ang

Wildcats, samtang ang beteranong guard nga si Floyd Taboada midugang og 12 puntos.

 Walay  duwa karong adlawa agi'g pagtamod sa kamatayon ni Oscar Jereza Jr., ang tag-iya ug bise presidente

sa University of Southern Philippines Foundation (USPF). Ang haya anaa karon sa  Cosmopolitan Funeral Homes sa

Nivel Hills, Lahug, ning siyudad.

Puntos matag usa

 USJ-R (79) - Senining 19, Galvez 13, Tabaloc 12, C. Parker 10, Regalado 9, M. Parker 6, Lajato 4,

Sanchez 4, Bayhonan 2

 CIT-U (66) - Dela Cerna 32, Taboada 12, Menguito 10, Brigolo 6, Graf 2, Tabalin 2, Batiquin 2 (BANAT NEWS)