Lancers midaog dayon

CEBU, Philippines - Gibuksan sa mas tag-as nga University of the Visayas (UV) Green Lancers ang bag-ong season sa 2013 Cebu Schools Athletic Foundation, Inc. (CESAFI) basketball tournament pinaagi sa pagkulit ug 81-62 nga kadaugan batok sa University of Cebu (UC) Webmasters kaniadtong Sabado sa gabii atol sa opening game nga giduyogan og grabeng pagbunok sa uwan nga misulod na gani hangtod ngadto sa lobby sa Cebu Coliseum nga nakahatag og dakong kahasol dili lang ngadto sa mga basketball fans apan lakip sab sa lokal nga mga sakop sa media nga nag-cover sa maong duwa.

Sa kasamtangan, nagpadayon pa ang duwa tali sa defending champion Southwestern University (SWU) Cobras batok sa University of San Carlos (USC) Warriors sa bugtong duwa ubos sa collegiate division. Laing tulo ka duwa pulos ubos sa high school division.

Ang Cobras ug ang Warriors dili pa lang dugay nagbagat sa finals sa Bogo City Inter-Collegiate basketball tournament sa miaging buwan diin mi-rally ang Cobras gikan sa 17 puntos nga biya aron sakmiton ang korona sa nahisgotang torneyo.

Sayong naglabaw ang Lancers ug miabot pa gani ang ilang labaw ngadto sa 20 puntos, 63-43 sa may 6:02 ang oras sa fourth period.

 Ang Cameroonian import nga si Mike Harry Nzuessue maoy nangu sa opensa sa Lancers sa iyang 16 puntos samtang si Arvie Cabañero midugang og 13 puntos.

Ang Webmasters kinsa wala mokuha'g import, gipangulohan sa ilang topgunner  nga si Noel Villanueva kinsa mibahug og 15 puntos apan didto na siya mag-igo sa second half kay wala mo-epekto ang iyang field shooting sa unang duha ka quarters. 

 Ang ilang team manager nga si Atty. Baldomero C. Estenzo mao una'y mi-coach sa Webmasters kaniadtong Sabado tungod kay mao pa la'y pag-abot sa ilang head coach nga si Roel Gomez  sa Sugbo atol sa game day gikan sa iyang duha ka buwan nga bakasyon didto sa New York City diin tua magpuyo ang iyang asawa nga nurse.

Siya na maoy mo-coach og balik sa Webmasters sa ilang sunod duwa unya sa Agosto 13 batok sa University of San Jose Recoletos (USJR) Jaguars.

Puntos matag usa:

UV (Coll.) 82— Nzuessue 16, Cabañero 13, Escocio 12, Abad 8, Babia 7, Octobre 6, Mendoza 4, Fajardo 4, Codilla 4, Akomo 3, Arong 2, Santillan 2.

UC (Coll.) 62 — Villanueva 15, Espiritu 9, Misa 8, Asis 7, Gomez 6, Auditor 6, Roche 4, Sigasig 3, Tamparong 2, Puerto 2. (BANATSPORTS)