2-time Olympian harisa Ironman Race PHL

CEBU, Philippines - Ang Australiano nga si Courtney Atkinson maoy bag-ong hari sa Men’s pro division sa makutas nga 2013 Cobra Ironman 70.3 Philippines  nga natapos kagahapon didto sa Shangri-La Mactan Resort and Spa, Lapu-Lapu City.

Ang 33-anyos nga si Atkinson kinsa usa ka two-time Olympian mipalagpot sa trono sa iyang kababayan og 2012 champion nga si Pete Jacobs.

Bisan pa sa taas ug makutas nga rota sa swim, bike ug run event, maisip gihapon nga sayun rang nakuha ni Atkinson ang titulo dihang layu kaayo ang iyang biya batok sa uban pa niyang mga kaatbang gawas ni Jacobs.

Si Atkinson mitapos sa lumba sulod sa tulo ka oras, 58 minutos ug siyete segundos, samtang si Jacobs nagsunod sa oras nga 3:59:09. Laing Australiano nga si David Dellow mipahiluna sa third place  sa oras nga 4:04:22.

Ang kanhi Ironman champion nga si Chris McCormack maoy fourth placer sa iyang 4:03:15, samtang si Brent McMahon sa Canada maoy mikompleto sa top five sa oras nga 4:04:05.

Sa iyang bahin, ang taga-Switzerland nga si Caroline Steffen maoy reyna sa Women’s pro division sa oras nga 4:16:12, gisundan ni Bree Wee (4:27:29) ug Australian nga si Belinda Granger (4:33:50) sa ikaduha ug ikatulong dapit.

Sila si Jacqui Slack (4:39:31) ug Filipina triathlete nga si Monica Torres (4:52:08) maoy fourth ug fifth placers.

Sa Ironman Men’s Filipino elite category, si Banjo Norte maoy migawas nga kampiyon sa oras nga 4:26:44 diin gilupig niya si August Benedicto nga adunay oras nga 4:32:38.

Mihatag usab og garbo sa Sugbo si John Philip Duenas nga maoy third placer sa oras nga 4:33:18. Sila si Arland Macasieb ug Franklin Penalosa nagsunod sa ikaupat ug ikalimang dapit sa oras nga 4:37:03 ug 4:43:08.  (BANATSPORTS)