CESAFI season 13 sugdan karon

CEBU, Philippines -  Pormal na nga buksan ang gikahinaman nga 13th season sa Cebu Schools Athletic Foundation Inc. (CESAFI) karong hapon uban ang daghang mga surprisa nga molingaw sa mga basketball fans diha sa Cebu Coliseum.

 Sa dili pa ang duwa, himuon una ang opening ceremony ug lakip na niini ang tradisyonal nga "Grand Palabas" nga mopakita  ug ang pagpili sa "Ms. CESAFI" sa juniors ug seniors divisions.

 Human sa tulo ka oras nga programa, ang University of the Visayas (UV) Green Lancers ug Baby Lancers mopakita dayon sa ilang mga labok batok sa tagsa-tagsa nilang kaatbang.

 Ang Baby Lancers makigsangka sa University of San Carlos (USC) Warriors sa season-opener sa alas-4 sa

hapon, samtang ang Green Lancers makigbatok sa University of Cebu (UC) Webmasters sa main event sa alas-5:45 sa  hapon.

 Ang Baby Warriors nga ubos na  karon ni coach Carlo Britt Reroma gustong mopamatuod nga dili tsamba ang ilang 82-85 nga kadaugan batok sa Baby Lancers sa usa ka tune-up game didto sa Sibonga.

 Sa ilang bahin, ang Green Lancers mosuway sa pagpakita nga aduna sila'y nakuha nga leksiyon sa ilang

pagduwa  sa 27th Universiade didto sa Kazan, Russia dihang makigtakus kini batok sa mas gagmay apan paspas nga Webmasters.

 Ang Green Lancers uhaw na kaayo sa korona human sila gipalagpot sa trono tulo ka tuig na ang nakalabay.

 Pangulohan sa ilang duha ka Cameroonian recruits nga sila si Steve Cedric Akomo ug Mike Harry Nzenssue, ang Green Lancers makasalig usab nilang reigning MVP Wowie Escocio, John Abad, Chris Perolino, Vincent Mendoza, Arvie Cabañero, Raffy Oktobre ug Angelo Babia.

 Ang Webmasters sa ilang bahin, maghangad sab sa ilang local mainstays nga silang Noel Villanueva, Jan

Michael Auditor, Christian Tamparong, Johnny Sigasig ug Arvin Kim Gomez. (BANAT PALARO)