Aegis Vipers mikuso-kuso sa 1&1 Marauders sa E-League

CEBU, Philippines - Gikuso-kuso sa Aegis Vipers ang 1&1 Marauders, 77-56 aron mao na lang ang bugtong team nagbarog nga walay pilde sa 9th CSCC E-League basketball tournament niadtong Domingo didto sa City Sports Club-Cebu.

Si Dean Junber Escalon mipupo'g 18 puntos ug si Steve Warren Navaja miani og 16 puntos alang sa Aegis nga nalansang sa unang dapit sa liderato sa overall sa ilang 5-0 nga baraha.

Ang Aegis milabaw lang og dos puntos paghuman sa unang 10 minutos sa duwa, 17-15, apan wala kini hunong mga mirumbo sa 1&1 Marauders sa mosunod nga mga kuwarter aron moposte og 28 nga bentaha, 65-38 paingon sa final period.

Silang  Argiel Fernandez ug Jan Isiah Gabest nagkumboya og 29 puntos apan nakawang lang ang ilang mga paningkamot kay ang 1&1 Marauders nakatilaw sa ilang ikaupat nga pilde sa unom ka duwa.

Sa laing aksiyon, si Archie Brian Vincent Batua mirehistro og tournament-high 43 puntos uban ang 11 ka rebounds ug tulo ka assists alang sa Accenture Sharks nga mikitkit og daog batok sa Telstra-Teletech Titans, 97-82.

Si Ryan Edward Llanos mitikdol og 23 puntos, samtang si Jasper Loreto  mitimang og 15 puntos alang sa Accenture nga nag-una sa  Southern Conference bitbit ang 7-1 nga baraha.

Upat ka players ang miiskor og double figures sa Telstra-Teletech sa pagpangulo ni Clifford Amarado nga mikadlit og 26 puntos uban ang lima ka rebounds. Si Jaeryl  Andrei Delicana mitampo'g 13 puntos, gisundan ni Edsel

Capillanes nga adunay 12 puntos, samtang si Ben Belena miamot og 10 puntos.

Sa lain pang duwa, si Raymond Dennis Tan mitusak og 13 puntos  alang sa ePerformax Reds nga milampurnas sa Kyocera Frontiers, 65-55.

Sila si Floyd Dean Singco ug Alejandro Ruiz nagkumboya og 22 puntos alang sa ePerformax nga nagtangag og 3-2 win-loss record.

Ang dinaog-daog nga Kyocera gipangulohan ni Winston Stephen Panal pinaagi sa iyang 18 puntos ug lima ka rebounds, gisundan ni Ariel Ramonito Edera nga adunay 17 puntos. Ang walay daog-daog nga Kyocera nakatilaw na sa ilang ikalimang sunod-sunod nga pilde.