Kinamangay Na
CEBU, Philippines - Masayran na karon kun kinsa sa duha ka walay pildeng boksidor nga sila si WBO bantamweight champion Paulus 'The Rock' Ambunda sa Namibia ug Japanese challenger Tomoki 'El Mexicanito' Kameda ang makatuman sa saad nila sa ila karong panagsangka sa main event sa "Battle of the Undefeated" fight card karong adlawa diha sa Waterfront Cebu City Hotel and Casino.
Human magbinayloay og mga hait nga pulong batok sa usa'g-usa, miabot na ang oras alang sa duha ka boksidor aron ipakita kun kinsa gyud ang angayan nga manag-iya sa kalibotanong titulo.
Atol sa official weigh-in kagahapon didto sa Caspian Room sa Waterfront Hotel, sila si Ambunda ug Kameda pulos mipakita sa ilang kaandam sa labing dakung away sa ilang karera dihang yano kaayo nilang nakuha ang 117 lbs. nga timbang.
Kini ang labing unang title defense ni Ambunda human niya makuha ang bakus gikan ni kanhi Thai boxing champ Pungluang Sor Singyu niadtong Marso 2.
Si Sor Singyu maoy mipahamtang og sakit nga kapildihan ni ALA Boxing Gym fighter AJ 'Bazooka' Banal niadtong Oktubre sa miaging tuig didto sa SM Mall of Asia Arena.
"I will bring my title back to Africa. I'm going to knock him out in any round. Any mistake he makes, he is going down," matud pa ni Ambunda nga mipakita na usab sa taas niyang kompiyansa nga modaog batok sa mas batan-on nga Japanese challenger.
Sa iyang bahin, si Kameda mihatag og tukma nga round kun kanus-a niya paligiron ibabaw sa ring si Ambunda aron mailog ang bakus. "I will win this fight and it will be by knockout within eight rounds."
Tumanon usab ni Kameda ang damgo sa ilang amahan nga mahimong world champion ang tulo niya ka mga anak.
Una nang nahimong world champion ang mga maguwang ni Kameda nga sila si Koki ug Daiki.
Sa supporting main event, ang pambato sa Rex 'Wakee' Salud gym nga si Marlon 'Nightmare' Tapales (22-2, 9KOs) makigharong ni Fredirex Rodriguez (11-2, 8KOs) sa Bukidnon sa 10-round non-title bout.
Moaway sab si WBC flyweight champion Sonny Boy Jaro batok ni Gherpaul Valera sa Noy Pacing Flores Stable sa Mandaue City.
Ang mga tiket nagkantidad og P2,500 sa VIP, P800 sa gold seats, P500 sa ballroom. Gipahibalo sa organizers nga ang general admission libre sa tanan. (BANAT NEWS)
- Latest
