Castañares 'hero' sa Sykes sa 9th CSCC E-League

CEBU, Philippines - Nahimong bayani  si Ray Oliver Castañares sa Syke Pioneer nga miiskor og kulbahinam nga kadaugan batok

sa Wipro Tigers, 65-63 sa 9th CSCC E-League Basketball Tournament niadtong Sabado didto sa City Sports Club-

Cebu gym sa Cebu Business Park.

 Si Castañares mirehistro lang og kuwatro puntos sa kinatibuk-ang duwa, apan ang iyang krusyal nga steal ug

duha ka free throws sa nahibiling nuybe segundos maoy nagtukmod sa Sykes aron matugkad ang kadaugan.

 Makuha na unta sa Wipro ang daog dihang ila ang ball possession diin nagtabla ang iskor, 63-all sa

katapusang nuybe segundos sa duwa, apan ang abtik nga si  Castañares misumpo sa kahigayonan sa Tigers pagtukob og

daog dihang iyang nailog ang bola gikan ni John Paul Cabrera.

 Sa tuyo nga maurong ang oras,  si Cabrera daling mi-foul ni Castañares, kinsa yano kaayong mipasud sa iyang

duha ka free throws nga maoy mikandado sa kadaugan.

 Gawas sa nihit kaayo niyang puntos, si Castañares mihimo sab og unom ka  assists ug duha ka rebounds alang

sa ikaupat nga daog sa Sykes sud sa unom ka duwa. Apan si Frederick Montelibano maoy topscorer sa Sykes pinaagi sa

iyang 15 puntos, samtang sila si Rey Louie Lepardo ug Gerald Bien  Galarido nagkumboya og 22 puntos ug 12 ka

rebounds.

 Si Reinario Salibay Jr. milabay og 17  puntos ug si Neptune Carungay midugang og 11 puntos alang sa Wipro

nga nakatilaw sa ilang ikaduhang sunod-sunod nga pilde sa lima ka duwa.

 Sa lain pang mga aksiyon, ang Lexmark Stallions milubong sa SSI  Warriors sa iskor nga 77-58, samtang ang

Teleperformance Lions milubong sab  og taga-liog sa Talleco Bandits, 82-38.

 Si Niel Tiempo maoy nangu  sa Lexmark nga mipabuhagay og 21 puntos, samtang silang Giovanie

Villahermosa ug  Ralph Loren Martinez mitampo'g 11 ug 10 puntos matag usa.

 Ang SSI nga nagbitbit og 1-5 nga baraha gipangulohan nilang Lawrence Daven Agas ug  Dennis Noel Poquita

nga nagkumboya og 22 puntos.

 Sa laing bahin, si Marco Antonio Real mikadlit og 18 puntos aron pangulohan ang Teleperformance, samtang

si Mark Matidos mao sab ang nangu sa napildeng Talleco pinaagi sa iyang 16 puntos. (BANAT NEWS)