Tabal, Prince Lee nanghawod sa MAPFRE Run

CEBU, Philippines -  Milampos si Mary Joy Tabal sa iyang pagdepensa sa korona, samtang si Prince Joey Lee nakatuman sab sa iyang pangandoy nga makampiyon sa men's open category sa MAPFRE Insular's 2nd Run For Road Safety niadtong Domingo didto sa Cebu Business Park.

 Nanghawod si Tabal sa women's 12K sud sa ikaduhang sunod-sunod nga higayon human niya gitapos ang lumba sud sa 44 minutos ug 26.69 segundos.

 Nagsunod si Mereeis Ramirez nga mioras og 52:11.83, samtang ang first runner up sa miaging tuig nga si Christy Sevilleno-Tutor nalabay sa ikatulo sa oras nga 55:01.40.

 Sa men's 12K, si Prince Joey Lee maoy  mipuhal  sa  mga pundok sa mga bantugang runners aron motungtong sa unang dapit.

 Gitapos niya ang lumba sud sa 41 minutos ug 26.69 segundos. Si Reiz Enriquez mi-okupar sa ikaduha sa oras nga 41:07.01, gisundan ni Jobert Cardino alang sa ikatulo nga mioras og 43:10.21.

 Sila si Lovely Fe ug Jhean Andrin miangkon sa unang-duha ka dapit sa women's 6K  uban sa oras nga

27:04.02 ug 27:21.20, samtang si Cherry Andrin   misakmit sa korona sa women's 3K sa oras nga 13:18.80.

 Samtang si John Daryl Manos mao sab ang nanghawod sa men's 6K human niya gitapos ang dagan sa oras nga 20:40.76, gisundan ni Rafael Pescos (21:07.73) ug Michael Largo (21:58.54) alang sa ikaduha ug ikatulo nga dapit.

 Si Bonifacio Monjas Jr. maoy mipatigbabaw sa men's 3K sa oras nga 10:42.18. Si John Cliff Debolosan miokupar sa ikaduha nga mioras og 11:04.36, samtang si Jess Gonzaga mipahiluna sa ikatulo sa iyang 11:33:01. (BANAT PALARO)