Upat nagsawo sa liderato sa SHAABAA Mivesa Cup

CEBU, Philippines -  Temporaryo karong nagsawo sa liderato ang Goldberry Suites, RDAK Transporters, Insular Square ug San Jose Bakeshop sa nagpadayong Sacred Heart Ateneo Alumni Basketball Athletic  Association (SHAABAA) Mivesa Cup niadtong Biyernes didto sa Sacred Heart School-Ateneo de Cebu basketball courts sa Gen. Maxilom Avenue, ning dakbayan.

 Ang upat  nagbitbit og managsamang 2-0 win-loss records.

 Gilamoy sa Goldberry ang Alberto’s Pizza sa iskor nga  72-53 sa pagpangulo ni Justin Huang, kinsa miburak og 24 puntos. Ang guard nga si Dave Ting midugang og 14 puntos, duha ka assists ug duha ka steals.

 Ang RDAK Transporters midaog sab  batok sa defending champions Cebu Landmasters, 43-41.

 Nagtabla ang duha,  41-all, apan si Ian Ong mibuhi sa iyang mahinungdanong basket aron ituboy ang RDAK ngadto sa kadaugan.

 Si Bernard Chioson  maoy bugtong player sa RDAK nga nakahimo’g double-figures sa iyang 11 puntos.

 Ang pilderong Landmasters gipangulohan ni Franco Te nga miugbok og 13 puntos.

 Sa laing duwa,  ang Insular Square  mimakmak  sa Gaisano Capital, 61-54 pinaagi sa pagtimon sa ilang speed demon nga si Ed Macasling, kinsa mihimo’g 11 sa iyang 19 puntos sa nanghinapos nga bahin sa duwa.  Silang Job Shan ug Leight Dixon  miamot og 10 puntos matag usa alang sa Insular Square.

 Si Patrick Jacobe miiskor og 17 puntos aron pangulohan ang  napildeng Gaisano Capital. 

 Midaog sab ang San Jose Bakeshop  human makaipsot batok  sa  San Remigio Aguilas sa iskor nga  61-59. (BANAT PALARO)