Sia hari sa July edition sa CEPCA chessfest

 CEBU, Philippines - Napilde si Peterson Sia ngadto ni Mike Banibane sa final round, apan nakahimo gihapon siya sa paghari sa July edition sa Cebu Executives and Professionals Chess Association (CEPCA) Monthly Tournament niadtong Domingo didto sa Deep Blue Café sa SM City-Cebu.

 Si Jun Olis sa organizing CEPCA miingon nga sila si Sia, Banibane ug Manny Abucay nagtabla paghuman sa 5-round Swiss system competition nga adunay 4.0 puntos matag usa, apan si Sia maoy miangkon sa titulo pinaagi sa superior-tie-break output.

 Nahimutang si Banibane sa ikaduha, gisundan ni Abucay. Sila si Joe Atillo ug Ruel Robillos mipahiluna sa ikaupat ug ikalimang puwesto nga adunay 3.5 puntos.

 Si Sia, kinsa miharos sa iyang unang upat ka duwa batok nilang Jun Pasion, Ruel Hortelano, lawyer Boy Tumulak ug Renato Robillos, bag-o na nga miyembro sa kahugpungan.

 Ang kanhi college chess standout nga si Sia, miabante na ngadto sa grand finals karong Disyembre uban sa nakasulod na nga silang Atty. Jong Melendez, NM Arnold Cadiz, Percy Fiel, Maggi Dionson, Manny Abucay ug Francisco 'Jun' Kidlat Jr. (BANAT NEWS)