SWU hari sa bogo

CEBU, Philippines - Gipasiugdahan ni Mark Jayven Tallo ang mainitong 37-16 fourth-quarter rally alang sa Southwestern University (SWU) Cobras aron modaug batok sa University of San Carlos (USC) Warriors pinaagi sa come-from-behind nga kadaugan ug milangkat sa korona sa Bogo City Inter-Collegiate kaniadtong Sabado sa gabii didto sa Bogo City Sports and Cultural Complex.

Ang Warriors igo lang untang milabaw og tres puntos atol sa halftime, 32-29 apan mipabuhagay sila'g  14-0 run pagsugod sa third period aron molabaw og 17 puntos nga maoy labing dako nilang abante sa maong duwa, 46-29 nga naglakip sa usa ka triple matag usa gikan nilang rookie Victor Rabat ug Nico Magat.

Wala madugay, nag-anam sab og hiyos ang labaw sa Warriors dihang migamit og pressure-defense ang Cobras nga maoy hinungdan nganong naka-apas ang mas dagko nga Cobras kinsa adunay bag-ong Cameroonian imports nga silang Landry Sanjo ug Fabrice Sewe.

Makita sa maong duwa nga mas nakabentaha gyud sa gidak-on ug gitas-on silang Sanjo ug Sewe  kung itandi nilang Ahmed Salihou ug Barry Amin sa Warriors. Apan kung depensa sab ang hisgotan, gipakita ni Salihou ang tanang niyang mahimo.

 Usa niana ka higayon, si Salihou kinsa miamot og 10 puntos, mihimo'g tulo ka block shots sa tulo sab ka ball possessions sa Cobras aron makapugos og 24-seconds shot clock violation nga nakapahimuot kaayo sa mga pro-Warriors fans.

Ang rason nganong daghan kaayo'g dumadapig ang Warriors didto sa Bogo tungod kay ang ilang mayor nga si Celestino E. Martinez, Jr. usa man ka alumnus sa USC  ug maoy ilang patron sa kasamtangan.  Gani, gidala gyud ni Mayor Martinez didto sa Bogo ang presidente sa USC Warriors Alumni Association nga si Nilo Velasquez aron mosaksi sa championship game.

Didto sab si Cebu Schools Athletic Foundation, Inc. (CESAFI) commissioner Felix O. Tiukinhoy, Jr. aron mosaksi sa duwa.

Si Tallo kinsa kanhi player sa UAAP uban sa De La Salle University Green Archers, maoy nangu sa Cobras sa iyang 26 puntos.  Midugang og 21 puntos si Sanjo ug maoy 13 puntos si Monbert Arong.

Sa habig sa Warriors, miposa ug 11 puntos si Magat aron maoy mangu sa opensa samtang pulos midugang og 10 puntos matag usa silang Salihou, Charles Pepito, Miguel Plata ug Ian Ortega alang sa Warriors.

Sa sayo pa, nakuha sa University of San Jose Recoletos (USJR) Jaguars ang ikatulong pwesto human sila maka-ipsot batok sa University of Cebu (UC) Webmasters sa iskor, 66-62.

Silang Christian Parker ug Miguel Tabaloc maoy nangu sa Jaguars sa ilang 13 ug 10 puntos, matag usa samtang ang Webmasters kinsa gipangunayan og coach sa ilang team manager nga si Atty. Baldomero C. Estenzo, gipangulohan sa ilang three-point artist nga si Noel Villanueva kinsa mituhog ug 17 puntos.

 Puntos matag usa:

First Game:

USJR (66)---    C. Parker 13, Tabaloc 10, C. Senining 8, Regalado 7, R. Senining 6, Galvez 4, Sanchez 2,  Lajato 2, M. Parker 2,  Rossel 2.

UC (62)---        Villanueva 17, Gomez 8, Auditor 7, Niones 7, Espiritu 6, Puerto 6, Miranda 3, Sigasig 3, Asis 3, Misa 2. Halftime: 28-27.

Second Game:

SWU (80)---       Tallo 26, Sanjo 21, Arong 13, Panerio 7, Sewe 6, Mohammad 4, Bregondo 2, Goloran 1.

USC (69)---        Magat 11, Salihou 10, Pepito 10, Oretga 10, Plata 10, Rabat 7, Amin 4, Que 3, Adlawan 2, Laude 2. Halftime:29-32. (BANAT PALARO)