Aegis lider sa North sa 9th CSCC E-League

CEBU, Philippines -   Temporaryo  karong nag-una sa liderato ang Aegis Vipers human nila gilubong ang Eperformax Reds, 74-61 sa nagpadayong 9th CSCC E-League basketball tournament niadtong  Domingo didto sa  City Sports Club-Cebu gym sa Cebu Business Park.

 Si Dean Junber Escalon mibagnos og 23 puntos ug milangkat og pito ka rebounds, samtang si Ryan Veloso mikadlit og 13 puntos ug si Frederic Yballe mitikdol og 11 puntos alang sa Aegis nga mibugwak og 26-12 run sa final period aron magsolo  sa liderato sa Northern Conference bitbit ang 4-0 win-loss record.

 Ang Eperformax nga nagtangag og 1-2 nga baraha gipangulohan ni Raymond Dennis Tan, kinsa mihakot og 13 puntos, gisundan nilang Patrick Anthony Ybañez ug Rafael Jose Cuico nga adunay 11 puntos matag usa.

 Sa laing bahin, ang Accenture Sharks nakarekober gikan sa ilang lab-as nga kapildihan pinaagi sa paglubong og taga-liog sa Talleco Bandits, 101-47 aron mangulo sa bracket B sa Southern Conference bitbit ang 5-1 nga baraha.

 Sila si Jasper Loreto ug Archie Batua maoy responsabli sa kadaugan sa Accenture. Si Loreto mikutlo og 24 puntos, samtang si Batua mitimang og 22 puntos.

 Laing naka-iskor og double figures alang sa Accenture mao sila si Merrick Tecson ug Ryan Edward Llanos nga mitimbre og 13 ug 11 puntos matag usa.

 Si Saul Branzuela mihipos og 12 puntos ug si Junmar Estrada miabuno'g 10 puntos alang sa Talleco nga nakatilaw na og tulo ka pilde sa upat ka duwa.

 Sa laing aksiyon, ang Telstra-Teletech Titans milansang sa ilang ikaduhang sunod-sunod nga daog pinaagi sa pagpilde sa SSI Warriors sa iskor nga 68-62.

 Gipangulohan ang kadaugan ni Clifford Amarado nga mipabuhagay og 24 puntos, gisundan ni  Lorenzo Ruiz nga adunay 12 puntos.

 Si Lawrence Daven  Agas mao sab ang topscorer sa SSI pinaagi sa iyang 14 puntos, samtang sila si John

Denver ug Ronald Campaña nagkumboya og 22 puntos. (BANAT PALARO)